Shillong, Nailar 02 : Ka Sorkar Jylla kala bthah ia ki briew bad ki samla kiba pule bad trei shabar ka Ri ba kin pynrung kyrteng ialade ha ka Portal ka Sorkar Jylla haba pynthikna ba kan buhrieh bha ia ki jingtip ban nym don ba tip briew.
Haba kren sha ki lad pathai khubor hynne ka sngi Thohdieng, u Nongaiktien ka MDA bad Myntri Sorkar Bah Paul Lyngdoh ula ong “Ka jingpynrung kyrteng ia ki briew/samla pule ba pule bad trei shabar ka Ri ka dei ka sienjam kaba kongsan bha na ka liang jong ka Sorkar Jylla”.
Ula ong ba kane ka rai ka dei kaba la shim hadien ka jingjia umsnam kaba khie ha Bangladesh ha kaba bun ki nong Meghalaya kila hap ban wan phet na katei ka Ri.
“Kiei kiei kila lamwir bha namar kaba nyngkong, ngim don jingkhein ia ka jingdon ki nong Meghalaya kiba sah ne kiba leit sha Bangladesh. Kumta hadien bala pynrung kyrteng, ka Sorkar Jylla kan ioh lut ia ki jingtip bad halor kine, kan lah ban leh ia kaba donkam kham sted” ula bynrap.
Kat kum ka jingong jong u, ka jingpynrung kyrteng kam dei kaba la buh kongsan. “Hynrei ngi pynshlur ia ki ba kin pynrung kyrteng ialade tangba ia ki jingtip shaphang jong ki, yn sa buhrieh bha ban nym don ba tip” ula ong.
