Shillong, Risaw 26 : U Symbud Myntri Rangbah ka Jylla Bah Prestone Tynsong ha ka sngi Palei, ula pyntip ba ka Sorkar kala bthah ia ki nongpyniaid jong ka tamasa Shillong Cherry Blossom ba kin pynsdang ia ka tamasa jong ka sngi kut (Sngi U Blei) hadien jong ki Jingiaseng namar ba mih ki jingpyrshah.
Haba iakren bad ki nongthoh khubor, u Bah Prestone ula ong “ Peit lada phi akren halor ka Sngi U Blei lane Sngi Saitjain ne Sngi Thohdieng, don ki por ba ka sngi pynkut/khatduh ka jia ha ka Sngi U Blei lane lehse ka sdang ha ka Sngi U Blei ne Sngi Saitain ne Sngi Thohdieng. Ai ba nga kular ia ki paidbah ka Jylla ba kane kam dei kaba ngi kwah ban leh ha ka sngi U Blei hynrei kane ka tamasa ka dei kaba lai-saw sngi bad kumta ka jia ryngkhat baka kut ha ka Sngi U Blei”.
“Kaei kaba ngi rai ka long ba ngi la dep bthah ia kito kiba pyniaid ia ka tamasa ba ha kane ka kylla ba mynta namar ba ka kut ha ka Sngi U Blei, ai ba kin pynsdang noh ia ka tamasa hadien ka 3 baje janmiet jong ka Sngi U Blei, kata hadien ba kut ki Jingiaseng” ula bynrap.
U Bah Prestone ula ong “Nga kwah ban kyrpad ia baroh ba sngewbha ban long kiba jai jai bad ngin sa iapeit pat naduh u snem ban wan kumno ban khein ia ki sngi khnang ba baroh kin iakmen lang bad baroh kin ioh jingmyntoi na kane ka tamasa”.
U Myntri ka tnad kam jngohkai ka Jyll bah Paul Lyngdoh dang shen, ula ong ba ka don ka buit politics ha lyndet ka jingpyr shah ban pynlong ia kane ka tamasa ha ka Sngi U Blei.
Halor kane, u Bah Prestone ula ong ba kam don satia kano kano ka jingbakla ia ki briew ba kin pynpaw ia ka jingsngew halor kane ka kam.
