Shillong, Nailar 14 : Ka Sorkar Meghalaya kala bthah ia baroh ki Deputy Commissioner (DC) bad ki Superintendents of Police (SP) ba kin shimkhia bha ha ka ban tehlakam ia ka jingthmu ki nong Bangladesh ban wan rung be-ain shapoh ka jylla.
Ia kane ka rai la shim hadien ba kala don ka jingioh kem ia ki 6 ngut ki runar kiba la rah ia ki atiar kaba la ialam da u pulit langrut ka ri Bangladesh, kiba la wan sha ka shnong Rongdangai ban thombor ia ki nongdie jingdie bad ban lute ia ka pisa bad ki jingdon jingem.
Haba iakren bad ki nongpathai khubor hadien ba la wai ka jingialang, u Symbud Myntri Rangbah ka jylla u Bah Prestone Tynsong uba khmih ia ka kam pohiing, ula ong, “Ba la dep ai ia ki jingbthah sha baroh ki DC bad SP ba kin shimkhia bha (ban tehlakam ia ka jingwan rungtuh) namar ba kila don katto katne ki jingjia”.
Ula pyntip ba ka jingwan rungtuh kala jia ha kylleng ki jaka naduh na East Jaintia Hills haduh ha Dalu ha rilum Garo ha shi lynter ka thain khappud bad ka ri Bangladesh.
“Ngi lah long kiba la husiar bha bad nga ngeit skhem ba ki pulit ki jong ngi kin lah ban kem bad ban pynphai biang ia kiteo kiba wan rung be-ain” la ong u Bah Prestone Tynsong.
Halor ka jingkylli, u Bah Prestone ula pyntip ba ka sorkar jylla kala dep ban aiti ia ka kaiphod sha ka Ministry of Home Affairs (MHA) halor ka jingioh kem kaba dang shen ia ki briew kiba na ka ri Bangladesh.
“Ha ka jingshisha, katkum ka kaiphod na ki pulit, kadei ka (jingjia kaba iadei bad ki) kam runar bad kam don eiei kaba palat ban ia katei. Ka jingthmu ka jongki ka long kaba shai kdar bha ban lute” ula ong.
U Symbud Myntri Rangbah ula pyntip ba uwei uba la suba donkti uba hakhmat eh ha katei ka jingjia, ula kawang da ki tiar pynbthei, ula ioh ban phet krad bad ban leit phai biang sha Bangladesh.
“Ka paw bai mat ula ioh ban leit phai sha Bangladesh. Hynrei ki pulit bad ki BSF ki dang don ha ka kam (ban kem ia u),” ula ong.
Haba kylli, u Bah Prestone Tynsong ula ong, “Ngam ong u pulit ne u bym dei pulit, kaei kaba nga ong ba ki nong Bagladesh kila leh ia kitei ki kam be-ain. Kumta la ai ka jingbthah ia baroh ki DC bad SP ba kin shimkhia thikna bha bad ban ba kum kitei ki jingjia kim dei ban iai jia biang”.
Halor ka jingpynbna ki BSF ia ka “Operation Alert” ha shi lynter ka khappud jong ka ri India bad Bangladesh, u Symbud Myntri Rangbah ula ong, “Ka sorkar jylla ruh kala shim ia katei kajuh hi ka polisi ha kaba ngi don ar tylli ki rukom treikam ban ialeh pyrshah ia ki kam be-ain ne ka jingwan rung be-ain shapoh ka ri. Kumta ki pulit ki jong ngi kila leh ia la ka kamram bad nga ngeit skhem ba da ka jingiatreilang hapdeng ki pulit bad ki BSF ngin sa lah ban jop pyrshah ia kitei ki jingtynjuh”.
 bad ki Superintendents of Police (SP) ba kin shimkhia bha ha ka ban tehlakam ia ka jingthmu ki nong Bangladesh ban wan rung be-ain shapoh ka jylla.){kind=link}