Shillong, Jymmang 12: U Symbud Myntri Rangbah ka jylla Bah Prestone Tynsong ula iathuh ba ka sorkar jylla kala bthah ia ki pulit khamtam eh ha nongbah Shillong ba kin tehlakam ia ki kam tuh bad ia ki briew kiba pynthud ia ka shongsuk shongsaiñ.
Kane ka jingkren u Bah Prestone Tynsong uba khmih ia ka tnad kam pohiing, ka dei halor ka jingjyllei ki kam tuh kam thiem ha ka nongbah Shillong khamtam haba bun ki longing kila sdang ban sheptieng ban ieh ia la ki iing ki sem.
“Ngi la bthah khamtam eh ia u Superintendent of Police jong ka East Khasi Hills bad ia u SP Shillong City ba kin trei shit rhem bad ka sorkar kan pynbiang ia ka jingdonkam jong ki pulit ban tehkam ia ki kam tuh kam thiem bad ia kiba pynwit ia ka shongsuk shongshngain ki paidbah la ka long ha ka por mynmiet ne mynsngi” ong u Bah Prestone.
Ula ong, ba ka sorkar kala sdang ia ka Integrated Command Centre (ICC) bad la buh ia ki CCTV bad kiwei kiwei ki kor, ban pynthikna ba mar ia iohi ia kiba leh kam sniew yn kem ne ban rah ia ki sha ka jaka jong ka ain bad ban pynshitom katkum ki kyndon ain.
