Shillong, Iaiong 12 : U Symbud Myntri Rangbah ka Jylla Prestone Tynsong hynne ka sngi Balang, ula pyntip ba ka Sorkar kala bthah ia ka Tnad Pulit ba kan pynthikna ba ka jingkhaii tuh ia u dewiong ka dei ia ka ban pynsangeh shisyndon hapoh ka Jylla.
“Mano mano ba kit ia u dewiong beain, kin shah kurup bad kin shah pynngat ha ki kyndon ain” ong u Bah Prestone haba iakren bad ki nongthoh khubor haba jubab ia ka jingkylli halor kane ka kam.
Ha ka sngi Ba-ar, ka Iingkashari Meghalaya High Court kala ong ba ka jingbym lah ban talasi ia ki kali ba kit palat pud ka kdew sha ka Sorkar Jylla kum ka mamla ha ka jingtih bad khaii tuh ia u dewiong kaba long ka jingbym burom ne niewkor ia ki hukum jong ka Iingkashari Supreme Court.
Haba shong bishar ia ka PIL, ka Division Bench kala ong “Ki don bun ki kam ba iadei bad ka jingkhaii tuh ia u dewiong, ka jingbym lah jong ka Sorkar ban tehlakam ia ki kali ba kit palat pud bad kiwei kiwei, baroh ka thew sha ka Sorkar Jylla kum kaba don bynta lang ha ka jingtih beain bad khaii ia u dewiong kaba long ka jingbym khein kor ia ka hukum bala pynmih da ka Iingkashari Supreme Court”.
Ia kane ka PIL la mudui da uwei u nongshongshnong ka Ri-lum Garo u Champer M Sangma.
