Shillong, Iaiong 08 : Ka Sorkar Jylla kala bthah ia ka Search Committee bala thung ban jied ia u Chairperson bad dkhot ba thymmai ka Meghalaya Lokayukta, ba kin aiti noh ia ki kyrteng ban thungkam hapoh ka 30-45 sngi.
“Ngi la kyntu ia ka Search Committee bala khlieh da u Ophisar IAS barim Bah Peter Dkhar ba kan pyndep noh kham kloi ia kane ka kam. Ngi khmih lynti ban aiti noh ia ki kyrteng hapoh ka 30-45 sngi. Shisien bala dep kane, ngin sa iashong biang ha ka Committee kaba khlieh da u Myntri Rangbah ba iadonlang u Lamphang ka Iingdorbar, Symbud Myntri Rangbah, Nongialam ka Liang Pyrshah bad Chief Justice ka Meghalaya” ong u Myntri Rangbah Conrad K Sangma haba iakren bad ki nongthoh khubor hadien ba pyniaid ia ka jingialang ka Kynhun Myntri ha ka sngi Ba-ar.
U pyntip ba ka Kynhun Myntri kala mynjur ruh ia ka Amendment jong ka Rules na ka bynta ka Search Committee da kaba pynbun ia ka jingsiew bai shong jingialang jong u Chairman bad ki Dkhot.
“Mynshuwa, ki dkhot ka Committee ki ju ioh T.2500 shisien shong jingialang bad la sngew ba dei ban pynkiew noh ia ka namar tang kawei lane artylli eh ki jingialang ki long. Ia ka pisa la pynkiew sha ka T.5000 ia ki dkhot bad ia u Chairman na ka T.3000 sha ka T.6000” ula bynrap.
