Shillong, Nailar 2: Ka Sorkar Jylla kala bthah ban pynlong ia ka jingtohkit halor ka jingkynnoh ba kala don ka jingjah klep jong u dewiong uba 4000 metric ton.
Symbud Myntri Rangbah ka jylla u Bah Prestone Tynsong uba khmih ia ka kam Pohiing ula ong, ba ia katei ka jingtohkit yn pynlong da ka bor pyniaid district ban lap ia ka jingshisha halor katei ka jingkynnoh.
U Bah Tynsong ula pynpaw ruh ba ka sorkar ka pdiang sngewbha ia kino kino ki jingtohkit ha kaba iadei bad ka jingtih be-ain ia u dewiong, ka jingkhaii bad ka rukom pyniaid.
“Mynta ngi lah dep ban bthah ia ka bor pyniaid district ban wad ia ka jingshisha bad ai ba ngin ioh pdiang shwa ia katei ka kaiphod bad ia katei ka kaiphod yn sap hah ruh sha ka Sorkar India” ong u Bah Prestone hynrei ula kyntait pat ban ong eiei halor ka jingkren u Myntri ka tnad Excise u Bah Kyrmen Shylla ba namar ka jingslap jur ha Meghalaya ka lah ban dei ka daw halor ka jingjah u dewiong uba 4000 MT, kumba la kdew ha ka 31st Interim Report kaba la aiti da u Justice BP Katakey ha ka iingbishar Meghalaya High Court.
U Symbud Myntri Rangbah ula iengskhem ruh ba ka ain kan sa leh ia kaba donkam pyrshah ia kino kino ki kam be-aiñ lada lap.
“(Kano kano) ka Supreme Court ne kano kano ka kynhun, ngi pdiang (ia kano kano ka jingtohkit). Nga ju ong ba ia kane ka mat jong ka jingtih be-ain ia u dewiong, ka jingkhaii be-aiñ bad ka jingkit be-aiñ ia u dewiong, man la ka por nga ju ong, lada ka don kano kano ka jingleh be-aiñ, kano kano ka jingpynkit be-aiñ, kano kano ka jingtih be-aiñ, ka ain ka don” ula ong.
“Ka sorkar kala bthah ia baroh ki bor pyniaid district, Superintendent of Police bad ia ki tnad kiba dei khmih ban khmih bniah halor katei ka mat ban pynthikna ba kam dei ban don kano kano ka jingleh kaba be-aiñ” ong u Bah Prestone
