Guwahati, Aug 14: Ha ka hukum kaba nang pyntieng pynsmiej ha ka jaka ban weng ia ka jingeh, ka Silchar Medical College and Hospital ha Assam ka la bthah ïa ki doktor kynthei, ki samla pule, bad ki nongtrei kynthei ba ki dei ban kiar na ki jaka ba kyndong, ki jaka kiba dum bad ki jaka ba duna briew.
Ia kane ka jingbthah la pynmih na ka bynta ka jingmyntoi jong ki doktor, ki samla pule bad ki nongtrei jong ka Silchar Medical College and Hospital, da kaba pynleit jingmut kyrpang ia ki kynthei.
Ia kane ka jingbthah la pynmih hadien ka jingjia kaba sngewsih kaba la jia dang shen ha R.G. Kar Medical College, Kolkata kaba la pynmih ia ka jingkhihwin ha ka ri baroh kawei.
Ka la kyrpad ia ki doktor kynthei, ki samla pule, bad ki nongtrei ba ki dei, katba lah, ban phikir bha ialade ha ba ki don marwei.
La khanglad ia ki samla pule kynthei ban mih na hostel ne kamra sah ha ka por miet lymda donkam, da kaba pyntip lypa sha ki bor ba dei peit. La bthah ia ki ban kiar na kaba leit shabar jong ka skulbah ha ki por ba lait ne “off”.
La bthah ia ki samla pule kynthei ba kin long kiba husiar bha bad ban kiar na ka jingdon jingiadei bad ki briew shimet ki bym ia iathuh ithaw bha.
Ka jingbthah ka ong ba lada ki don ia kino kino ki jingeh ne kino kino ki jingjia ia ki, ba ki dei ban pynsngew mardor, sha ki Chairmen/ ki Dkhot jong ka Gender Harassment Committee, Disciplinary Committee, Internal Complaint Committee, Anti Ragging Committee.
Ha kane ka sngi thohdieng, ka National Medical Commission ka la bthah ia baroh ki Medical College ban thaw ia ka policy na ka bynta ka jaka treikam kaba shngain hapoh jong ka College bad Hospital campus na ka bynta ka bha ka miat jong baroh ki nongtrei kynthup ia ki nonghikai, ki samla pule doktor bad ki Doktor ba shong basah.
Ka jingai jingmut ka ong ba ka policy ka dei ban pynthikna ia ki lad jingiada kiba biang ha ki OPD, ki ward, ki jaka sumar ia kiba mynsaw, ki hostel bad kiwei kiwei ki jaka ha ka campus bad ki jaka sah. Ki lynti iaid bad ki campus ki dei ban don ka jingpynshai bha ha ka por janmiet khnang ba ki nongtrei kin iaid suk na kawei ka jaka sha kawei pat bad baroh ki jaka kiba kynjah dei ban pyndait da ki CCTV ban peitngor.
Ka ong ba ki lad jingïada kiba biang kynthup ïa ka jingbuh ïa ki nongtrei pahara kiba biang (kynthei bad shynrang) dei ban pynbiang ha ki OPD, ki ward, ki nongpang, ki kamra kha khun, ki hostel bad ki jaka sah bad kiwei kiwei ki jaka jong ki Medical College bad Hospital campus.
Ka ong ruh ba kano kano ka jingjia thombor ïa ki samla pule doktor dei ban tohkit mardor da ki bor pynïaid jong ka kolej bad dei ban ujor FIR sha ki Pulit. Ka kaiphod kaba bniah halor kano kano ka jingjia jong ka jingshah thombor dei ban phah beit sha ka tnad sumar jong ka ri (NMC) hapoh 48 kynta naduh ba la jia ka jingjia.
