Guwahati, Nailur 26 : Ka Iingkashari Supreme Court ha ka sngi Nyngkong, kala hukum ia ka Unique Identification Authority of India bad ka Sorkar Manipur ba kin shim ia ka sienjam ha kaban ai biang ia ki Aadhaar sha ki briew kiba la pynjah ia ka Card namar ka kam iaumsnam ha Manipur.
Kala ban jur ruh ba donkam ban da pynthikna shuwa ia ka jingai Aadhaar ban pynthikna ba ki nongwei ba rung beain kin ym ioh shim kabu.
Ka Kashari bala khleh da u Chief Justice of India DY Chandrachud kala hukum ia u Deputy Director General ka AIDAI, Guwahati bad Home Secretary ka Manipur ba kin ai Aadhaar number sha kito kiba la buh bakla ne pynjah ia ki kot ki sla namar ka jingkylla phetwir ha ka jingiaumsnam kaba la shim ia 175 ngut ki jingim bad pynkylla phetwir ia 70,000 ngut.
Hynrei ka Iingkashari kala pynshai ba dei ban da shim shuwa ia ki lynti ban pynthikna ia ki briew shuwa ban ai ia ki Aadhaar Card.
Kane ka hukum kala mih hadien ba u Senior Advocate Vibha Datta Makhija, ba mihkhmat ia ka panel, ula kyntu ia ka Iingkashari ban bthah ha kaban ai biang ia ki Aadhaar nombor sha ki briew kiba la pynjah namar ka jinglong jingman ha Manipur.
Ka Iingkashari kala bthah ruh ia ka Bar Association ha Manipur ba kan khang ia kino kino ki nongiasaid Ain, khlem da khein Jaidbynriew ban wan mihkhmat hakhmat ka IIngkashari.
Kano kano ka jingpynkhreh ia ka hukum kan khring ia ka jingialeh pyrshah ia ka hukum ne contempt of court, kala ong.
