Shillong, Rymphang 11 : Ka Committee uwei u Dkhot jong ka Iingkashari Meghalaya High Court, kala bthah ban die lilam noh ia u dewiong bala dep lum jingkhein biang hapoh ka 31 tarik Lber.
Ha ka interim report ba 12, u Justice (Retd)BP Katakey ula ong “Ka Committee ka ai jingmut ban lilam noh ia baroh u dewiong bala dep lum jingkhein being da ka CIL hapoh ka 31/3/2024 namar ka jingbym lah ban pyndep hapoh ka por bala buh kham mynshuwa namar ka jingbym pynkut ia u dewiong na ki par sha ki depot bala buh”.
“Ka ai jingmut ba dei ban shimkhia mar mar ha kaban buh aplikeshon hakhmat ka IIngkashari ban lilam noh ia u dewiong khnang ba baroh u dewiong uba la kurup, yn lah die noh mar mar” ula ong.
Ka kaiphod kala ong ruh ba ka Committee kala ai jingmut ba ka por ba khatduh ban shalan ia une u dewiong sha ki depot bala buh ka dei ban long noh hapoh ka 29 tarik Rymphang 2024 bad kumta ia une u dewiong ba ieh ha ki par, lada ki dang don bad bym pat die beain ne khaii beain, dei ban kurup noh da ki bor Sorkar bad pynkit noh sha ki depot hapoh ka shibnai ban ioh lilam noh ka CIL.
La ong ba ia ka pisa ba ioh naka jinglilam ia une u dewiong ba kurup, dei ban pynthep da ki trai sha ka pla tyngka ka Sorkar kum ka jingpynsajia hadien b aka CIL kala dep lilam bad siew sha ka MEPRF. Dei ban pynbna paidbah ruh da ka ktien lajong ka Jylla na ka bynta ka jingtip jong baroh.
Ha kajuh ka por, ka Committee kala ai jingmut ban leh ia ka drone survey bad ring video ha ki 4 tylli ki District hadien ka jingdep pynkit ia u dewiong bala lum jingkhein biang sha ki depot bala buh, khnang ban lap ia ka jingdon u dewiong ba tih thymmai ha kine ki District, ba lada shem ba un kurup biang ia ki hapoh ka kyndon ka MMDR Act, 1957 bad ban die noh ruh ia u ha kaba ka pisa kaba mih yn thep sha ka pla tyngka ka Sorkar bad sha ka MEPRF.
Ka Committee kala ai jingmut ban pynmih iaka jingbthah ia u Superintenent of Police ka East Jaintia Hills ba un pyndep kloi ia ka jingtohkit halor ka jinglap ia u dewiong thymmai ha Don Bosco College Byndihati (Khliehriat PS Case No 87(11)2023) khnang ba lada lap iano iano kiba donkti ha kane ka kam, kin ngat ha ki jingpynsajia hapoh ka ain.
Ka Committee kala ai jingmut ruh ba u Deputy Commissioner ka East Jaintia Hills u dei ban aiti noh ia ka kaiphod halor ka sienjam b aula shim halor ka weighbridge bala pynieng ha lyndet ka Don Bosco College Byndihati hapoh ka artaiew.
