Shillong, Nohprah 16 : Ka Iingkashari Meghalaya High Court hynne ka sngi thohdieng, kala bthah ia ka Sorkar Jylla ba kan thaw ia ka Committee na ka bynta ban pynsted noh iaka jingiadie iathied bad jingiapynbeit ia ki jyrwit jyrwat kiba mih na ki jaka ba thmu pyntrei ia ka surok Shillong-Dawki.
Haba shong bishar ia ka PIL, ka Iingkashari kala ong “La bthah ia ka Sorkar Jylla ban pynthikna ba kan thung ia ka Committee jong u Chief Engineer ka PWD (Roads) bad ki Ophisar ba bat ia ka kyrdan Secretary, na ka bynta ban pynkloi bad iaid beit ka jingaiti ia ki jaka bala dep thied bad ban iapynbeit noh ia ki jyrwit jyrwat bad ki trai jaka kiba lah ban mih ha kiwei ki bynta jong ka surok khnang ba yn lah ban pyntrei bad pyndep noh ia ka surok khlem ka jingpynslem kai”.
Ka Iingkashari kala bthah ruh ia u Secretary ka Tnad PWD ka Jylla ban file ia ka affidavit ba pynpaw ia ki sienjam bala shim bad ka jingiaid jong ka kam haba iadei bad kane ka bynta.
“La shem ba kam idon satia ka jingshimkhia da ka Jylla, la dei ban thaw ia ka Committee da ka Iingkashari” ong ka Iingkashri ha ka hukum.
Ka National Highways Infrastructure Development Corporation Limited (NHIDCL) kala pyntip ha Iingkashari ba ka surok Shillong-Dawki, kaba la phiah haduh san bynta (5 pakage), kala mad ia ka jingeh namar tang artylli ki bynta kila iaid ha ka jingtreikam bad namar ka jingdon ki jyrwit jyrwat bad ki trai shnong ba iadei bad ka jingaiti ia ki jaka bala thied, ki arngut ki contractor jong ki lai tylli ki bynta jong ka surok kila iehnoh ia ka kam.
Haba iadei pat bad kiwei ki bynta jong ka surok, ka NHIDCL kala kyrpad ban thung ia ka Monitoring Committee ban pynthikna ba ki jaka baa dep thied na ka bynta kane ka kam, ban aiti noh mardor bad ban iaid lait na ki jingeh ban tan lain ia ka surok namar ka jingtuklar jong ki trai shnong ha ki katto katne ki bynta.
