Shillong, Iaiong 27 : Ka Iingkashari Meghalaya High Court hynne ka sngi Palei, kala bthah ia ka Jaintia Hills Autonomous District Council (JHADC) ban leh ia kano kano ka kam ha ryngkat bad ka Jowai Municipal Board (JMB) ban weng ia ka jingeh jong ki Nongshongshnong ba iadei bad ka jinglum niut ha Sor Jowai.
“Ia ka mynta, ka JHADC ka dei ban leh ia kano kano ka kam ha ryngkat bad ka Municipal ban weng ia ka jingeh ki Nongshongshnong” ong ka Division Bench ha ka hukum bala pynmih hadien ka jingshong bishar ia ka PIL bala mudui da ka Synjuk ki Waheh Shnong Jowai.
Ka Jowai Municipal Board kala file ia ka affidavit haba pyntreikam ia ka hukum jong ka Iingkashari kaba pynmih ha ka 17 tarik Iaiong, 2023.
Ka Nongmudui kala pynsngew ia kiba bun ki mat bad ong ba baroh kim biang satia haba iadei bad ka jinglum ia ki niut ha sor Jowai.
Iaka affidavit jong ki Nongmudui la dei ban file noh hapoh ka shitaiew na kane ka tarik, ong ka Iingkashari haba bynrap ba kane ka mukotduma kan wan biang sha ka jingbishar hadien ka 10 sngi.
Ka Iingkashari kala buh ban bishar biang ia ka kam ha ka 12 tarik u Jymmang.
