Shillong, Naitung 15 : Ka Iingkashari Meghalaya High Court ha ka sngi Ba-ar, kala bthah ia ka Ministry of Defence, ka Sorkar Jylla, ka Airport Authority of India (AAI) bad ia u Director General ka Civil Aviaton ba kin pyndep kloi noh ia ki kam ki jam baroh ban lah pyntrei kloi ia ka project ban pynheh ia ka Shillong Airport.
Kane ka jingbthah kala wan hadien ka jingshong bishar ia ka kaiphod bala aiti da ka Airport Authority of India.
Ha ka hukum bala pynmih hadien ba shong bishar ia ka PIL halor kane ka kam, ka Division Bench ba kynthup ia u Chief Justice IP Mukerji bad Justice W Diengdoh kala ong “Haba bishar ia kane ka kaiphod, ngi shem ba haduh mynta dang dep leh tang ki kam ba rit ba ria kiba donkam ban leh ha kaban pynheh bad shna bha ia ka Shillong Airport. Naduh mynta, donkam ban leh kham bun ki kam ha ka lynti kaba sted ban lah pyntreikam noh ia kane ka project ha ki sngi ban wan”.
“Kumta, baroh ki bor ba dei khmih kin hap ban pynkloi noh ia ki kam ki jam kynthup ka Ministry of Defence, ka Sorkar Jylla, ka AAI bad u Director General ka Civil Aviation” kala bthah.
Ka Iingkashari kala bthah ruh ban suh lang ha ka affidavit ia ka jingthoh bala pynkhreh da ka Sorkar Jylla halor ka project, kaba hap ban smai da u Ophisar jong ka Jylla bad ban aiti sha ka Iingkashari hapoh ka 18 tarik Naitung.
Haba bishar ia kane ka jingthoh, ka Iingkashari ka shem ba donkam haduh 22 acre ka jaka na ka bynta ka project ha kaba 10.30 acrea ka dei kaba hap shim na ki bor shipai. Ka Sorkar Jylla kala mynjur ban thied ia 11.75 acre ka jaka ha ka dor ba T. 72,17,56,237 da kaba iasoi ia ki soskular iadie iathied bad ki trai jaka. Ia kine ki jaka la khmih lynti ban thied hapoh u Naitung mynta u snem. Ka Ministry of Defence kala ai jingbit ia ka Jylla ba kan pyndonkam ia 10.30 acre ka jaka shipai ha Umroi Military Station, Shillong halor ka soskular bad ka Sorkar ba kan ai bujli ia ka jaka ba shongdor kumjuh sha ka Ministry.
Kat kum ka draft master plan, ka jingpynheh ia ka runway 4 (RWY 4) kan long da 571 meter ka ban long baroh lang haduh 2400 meter. Da ka jingpyndep ia kane ka RWY 4, ka jingwan hiar ki liengsion kan long na ka runway 22 (RWY 22) bad kin her pat na ka RWY 4.
Ka Iingkashari kala buh ban shon gbishar biang ia kane ka kam ha ka 12 tarik Nailar, 2025.
 bad ia u Director General ka Civil Aviaton ba kin pyndep kloi noh ia ki kam ki jam baroh ban lah pyntrei kloi ia ka project ban pynheh ia ka Shillong Airport.){kind=link}