Shillong, Jylliew 13 : Ka Iingkashari Meghalaya High Court ha ka sngi Thohdieng, kala bthah ia ka Sorkar Jylla ba kan leh eiei halor ka jingkynnoh duh ei ia ka khajna ba T.640 klur namar ka jingbym lah ban talasi bad kem ia ki kali ba kit mar palat puda ha ki 28 tylli ki weighbridge bad ka jingbymdon kine ki khyrdop ha ki jaka ba kongsan hapoh ka Jylla.
Ha ka hukum bala pynmih hadien ba bishar ia ka PIL bala mudui da u nongtrei monsngewbha Tennydard M Marak, ka Division Bench ba kynthup ia u Chief Justice IP Mukerji bad Justice W Diengdoh kala ong “Ngi don ka jingsngew ba ka jingduhei ia ka khajna ka dei kaba kongsan bha ha kane ka mukotduma”.
“Ngi bthah ia u Principal Secretary ka Tnad Transport ban bishar bniah ia ka jubab jong u nongmudui bad ban file ia ka affidavit ba pyrshah ha kane ka Iingkashari hapoh ka 5 tarik Naitung, 2025, kaba kren halor ka jingkynnoh . Ka Sorkar ka dei ban leh eiei haba iadei bad kane ka jingkynnoh, lada shem ba ka long kaba shisha” kala bynrap.
U Tennydard ha ka mudui ula kynnoh ba ki don bun tylli ki jaka ba kongsan ki bym don satia ia ki weighbridge, ki kam be-ain bala leh da ki Nongtrei Sorkar ha ki 28 tylli ki weighbridge kynthup ka jingdonkti jong kito ki nongtrei ha ka jingailad ia ki kali ba kit mar palat pud ba kin iaid na weighbridge khlem da thew.
Kane nalor kiwei kiwei kala lam sha ka jingduhei ia ka khajna ba T.640 klur sha ka Sorkar.
Ha kajuh ka por, u Tennydard ula tynjuh pyrshah ia ka kaiphod bala aiti da ka Sorkar ba la leh ia ka jingjurip ha ki 24 tylli ki weighbridge bad la shem ba ha baroh kine ki weighbridge, ym shym la lap satia ia ki trok ba kit palat pud ba kin ioh iaid lyngba ki weighbridge.
