Shillong, Naitung 19 : Ka Iingkashari Meghalaya High Court ha ka sngi Balang, kala bthah ia ka Sorkar Jylla bad ka National Highway Authority of India (NHAI) ba kin nang ai shuh shuh ia ka kaiphod haba iadei bad ka bynta jong ka surok na Jowai sha Ratacherra, kaba dei jong ka surok National Highway-6 hapoh ka saw taiew.
“Baroh ar kynhun ka Sorkar bad ka NHAI kin hap ai shuh shuh ia ka kaiphod jong kane ka kam haba wan biang sha ka jingbishar hadien saw taiew” ong ka Division Bench ha ka hukum hadien ba shong bishar ia ka PIL bala mudui da u Bah Kynjaimon Amse.
Kala bthah ruh ia ka Sorkar Jylla ban pynlong ia ka jingialang bad ki Nongmihkhmat jong ka NHAI lem bad ki bor District ba kin leh eiei halor ki jingeh kiba iadei bad ka bynta jong ka surok na Jowai-Ratacherra.
U Nongmudui ula kdew ba ka kaiphod bala ai da ka NHAI kala kdew ia ki jingeh ba pynmih hi da ki briew ia kiba dei ban pynbeit da ka Sorkar Jylla.
Kum ka nuksa, ka jingmih ki jaka sait kali ha kylleng ka Jylla bad National Highway ha ka Jylla khlem ki nala kiba biang lane ki kyndon kiba don ia kane ka kam. Namar kata, ka um na kine ki jaka sait kali kila tuid sha ki Highway bad pynpei thliew ia ka surok ha kiba bun ki jaka bad nang pynjot arshah ban ia u slap ka por lyiur.
Ka NHAI ha ka kaiphod kala kdew ruh ia ka jingsiang pipe um ba pathar ha surok ka Jowai sha Ratacherra kaba lam sha ka jingpei um ha kiba bun ki jaka bad nang kynton ia ka jingeh bad nang khlong ia ka rong jong ka surok.
Kine bad kiwei ki mat bala pynpaw ha ka kaiphod jong ka NHAI ki dei ia kaban hap leh eiei da ki bor District bad ban buh noh ruh da ki kyndon na ka bynta ki jaka sait kali ba kin pyntreikam kynthup ka jingsiew ia ka bai licence lane kiwei kiwei.
Haba iadei bad ka Jowai Bypass, ka Iingkashari kala bthah ba ka jingmaramot ia kane ka surok ka dei ban dep noh hapoh une u bnai ba mynta.
