Shillong, Nailar 14 : Ka Iingkashari Meghalaya High Court kala bthah ia ka Shillong Municipal Board (SMB) ba kan aiti ia ka kaiphod halor ka jingdon ki nongshong dukan madan kynthup kito kiba khlem pat don licence ha ki thain Laitumkhrah.
Kane ka hukum ka Iingkashari kala mih haba shong bishar ia ka aplikeshon bala buh da ka Seng Samla Laitumkhrah “Ieng Skhem Ha Ka Hok”, kaba pan ban bynrap ia ka kum ka liang mamla ha ka Public Interest Litigation (PIL).
“Ngi bthah ia ka Shillong Municipal Borad ba kan ai ia ka kaiphod ha kane ka Iingkashari haba iadei bad ka jingdon ki licence ban shong dukan madan bala ai ban shong dukan madan ha ryngkat bad ka kyrteng jong kiba ioh licence ha ka thain Laitumkhrah” ong ka Iingkashari Division Bench ba kynthup ia u Chief Justice IP Mukerji bad Justice W Diengdoh ha ka hukum ba pynmih ha ka sngi Palei.
“La bthah ruh ia ka Board ba kan leit jurip, pynlong ia ka jingtohkit bad pynpaw ha ka kaiphod ia ka kyrteng bad ka jingdon ki nongshong dukan madan kiba die ia ki mar ki mata khlem ka licence ha ka thain. Ia kane ka kaiphod dei ban aiti ha kane ka Iingkashari hapoh ka 28 tarik Nailar, 2025” kala bynrap.
Ka Seng Samla Laitumkhrah kala pynpaw ia ka jingsngewkhia halor ka jingshong dukan madan ba khlem ain bad ba khlem ioh jingbit da ki nongshong dukan madan ha ka thain Laitumkhrah ha Shillong.
Ka kwah ba ka hukum bala pynmih da kane ka Iingkashari ban pynkhuid ia ki katto katne ki jaka jong ka Nongbah na ka jingdon ki nongshong dukan madan ba khlem licence, kum ka Police Bazaar ban pyniar sha Laitumkhrah da kaba kyndang iaki dukan madan ba khlem licence na ki surok bad lynti iaid kjat ba kin kylluid, khuid, ban sngain ia ki nongleit nongwan bad ki kali.
Hynrei, ia kane ka jingkyrpad jong ka Seng Samla la pyrshah da ka nongmudui ka Meghalaya & Greater Shillong Progressive Hawkers and Street Vendors Association (MGSPHSVA) bad u nongiasadi ka Jylla halor ka nongrim ba ka IIngkashari ha kane ka PIL kala shimkhia ia kane ka jingeh ha baroh ki surok bad lynti iaid ka Shillong.
Kat kum ka jingong u Tangi B Additional Advocate General, ka kam kala dep ban leh da ki bor Sorkar ha ka thain Police Bazaar bad yn sa nang pyniaid ruh sha kiwei ki jaka da ki wat ki wat. Kam sngew donkam ia kawei pat ka kynhun ne liang mamla ban pyniadon bynta lang ha kane ka PIL namar ka lah ban nang pynjyrwit jyrwat ia ka kam.
Ka Iingkashari kan sa shong bishar ia ka jingkylli kaba mih ban bynrap ia ka Seng Samla Laitumkhrah kum ka liang mamla ha ka sngi shong bishar ban wan.
 ba kan aiti ia ka kaiphod halor ka jingdon ki nongshong dukan madan kynthup kito kiba khlem pat don licence ha ki thain Laitumkhrah.){kind=link}