Shillong, Nohprah 16 : Ka Iingkashari Meghalaya High Court hynne ka sngi thohdieng, kala bthah ia ka National Highway Infrastructure Development Corporation Limited (NHIDCL) ba kan bishar biang ia ki nongrim jong ka bad ban pynthikna ban pynduna katba lah ia ka jingktah ne pynkhyllem ia ki dieng ha ka jingpynheh ia ka surok hapdeng ka Anjalee haduh Jhalupara bad ka jingshna ia ka Flyover ha Rilbong Point.
Kane ka project ka dei shibynta jong ka jingpynheh ia ka surok Shillong-Dawki kaba jrong kumba 31 kilometer.
Ka Iingkashari kala pynmih ia kane ka jingbthah haba shong bishar ia ka PIL bala mudui da u nongiasaid ain Kaustav Paul haba iadei bad ka jingthmu ban pynkhyllem haduh 103 tylli ki dieng ban pynheh ia kane ka surok (Anjalee-Jhalupara).
Ka Iingkashari ka ong ruh ba la pynkynmaw ia ka NHIDCL ba ym kumba long ki kam bala shu ieh ha kiwei ki bynta jong ka surok hadien bala pynkhyllem ia ki dieng, kam dei ban pynsuki ia ka kam bala pyntrei na Anjali Point sha Jhalupara khamtam hadien bala pynkhyllem ia ki dieng.
Kala bthah ruh ia ka NHIDCL ba kan ai jingtip ia ka por ba ka buh ban pyndep ha ka dur jong ka affidavit, ka ban pynpaw ruh ia ka jingsngew hadien ba shongbishar biang ia ka kam ba iadei bad ka jingpynkhyllem ia ki 103 tylli ki dieng ha kane ka bynta jong ka surok.
Kat kum ka jingpynpaw ka NHIDCL, ka don ka jingeh ha Rilbong Point ha ka jaka ba ka surok ka khun sha ka mon shaphang ka Guwahati bad ruh ka surok kaba iaid beit beit sha Upper Shillong haba ki kali ki wan sha Anjalee Point.
Ka Iingkashari kala pynpaw ia ka jingkyrmen ba ka NHIDCL kan sa thung bujli ia ki dieng ha ki jaka ba ka pom ia ki dieng ban pynheh ia ka surok. La kyntu ruh ba kan pynthikna ba kan thung ia ki dieng kiba jrong hadien bala pyndep ia ka project khnang ba ka jingitynnad jong ka jaka kan wan phai biang ha kane ka surok.
Ka Iingkashari kala buh ban bishar biang ia kane ka mukotduma ha ka 6 tarik u Rymphang.
