Shillong, Naitung 30 : Ka Iingkashari Meghalaya High Court kala bthah ia ka Committee bala thung da u Chief Secretary ka Jylla, ba kan pynlong shuh shuh ia ki jingialang ban lah pynbeit ia ki jingiakajia haba iadei bad ki jaka thang briew bad ki lum jingtep na ka bynta ki Jaidbynriew bapher bapher hapoh ka Jylla.
“Ngi bthah ia ka Committee ba kan khotbad pynlong kham bun ki jingialang bad shim ia ka rai” ong ka Divisional Bench ba kynthup ia u Chief Justice IP Mukerji bad Justice W Diengdoh ha ka hukum bala pynmih hadien ba shong bisahr ia ka PIL ha ka sngi Balang.
Ka Iingkashari kala shem ruh ia ka jingiapher jingmut hapdeng ki Hindu bad ki paid Khasi-Jaintia ha ba iadei bad ka jingpyndonkam lang ia ka jaka thang briew, bad ka jingduna ki lum jingtep ia ki dkhot jong ki paid Khristan, kiba don ha ki niam bapher bapher bad la ki jong ki lum jingtep.
Ban lah pynbeit ia kane ka kam, la thung ia u Amicus Curiae ban pynbeit ia ka jingiakren hapdeng ki kynhun bapher bapher, kynthup ki heh Sorkar.
U Amicus Curiae ula pyntip hapoh ka Iingkashari ba la dep ban pynlong ia ka jingialang bad kin dang don ki jingialang ki ban sa long shen ban pynbeit ia ki jingiapher jingmut baroh.
Katto kane ki dkhot ki paid Hindu, Khasi bad Jaintia kila mynjur ban iapyndonkam lang ia ka jaka thang briew da kaba phiah ia ki bynta bynta hapdeng jong ki.
“La pyntip sha ngi da u Amicus Curiae ba katto katne ki dkhot ki Hindu, Khasi bad Jaintia kila mynjur ban pyndonkam lang ia kajuh ka jaka thang briew. Ula pyntip ruh ba lada lah ban pynkohnguh lang ia kiwei ban bud ia kane, kan kham bha shuh shuh. Lem kumta, ka Committee ka lah ban shim rai ha kaban thied ia ka jaka ban pyndonkam ha kaban thang ia ki metiap” ong ka Iingkashari.
Ka Iingkashari kala bthah ia ka Committee ba kan nang wad shuh shuh ia ki lynti bad shong pyrkhat ruh ha kaban thied jaka ban pyndonkam ha ka jingthang ia ki briew ba iap lada donkam.
Ka Committee, kaba kynthup ia ki kynhun bapher bapher bala jied, la bynshet ba kin shim ia ka rai halor ka jingpyndonkam lang ia ki jaka thang briew bad lum jingtep hapoh ka Jylla.
Ka Iingkashari kala bthah ia u Amicus Curiae ban aiti ia ka kaiphod ba lyngkot halor ki kam kiba la dep ban leh da ka Committee.
Ia kane ka PIL la buh ban shong bishar biang ha ka 14 tarik Nailar, ban peit ia kaei kaba jia ba man bad shong bishar ia ki kam bala leh da ka Committee.
