Shillong, Lber 11 : Ka Iingkashari Meghalaya High Court ha ka sngi Ba-ar kala bthah ia ka Central Bureau of Investigation (CBI) ban aiti ia ka thup ba khatduh jong ki sakhi ka jyrsieh tah sia lieh ha ka thungkam nonghikai u snem 2009.
Haba pynmih ia ka hukum, ka Iingkashari bala khlieh da u Chief Justice IP Mukerji kala ong “ Ha kine ki jinglong jingman, mynta ka sngi kane ka Iingkashari ka pyniaid ban sngap ia ka aplikeshon ba hakhmat eh hapoh ka kyndon 482 jong ka Criminal Procedure Code ban pynlah ia ka CBI ba kan aiti ia ka thup ba khatduh jong ki sakhi ki ban kylli jingkylli. Ynda la dep kylli jingkylli ia ki sakhi, ka Iingkashari ba shim bishar ka lah ban pyniaid shakhmat iaka jingbishar shuh shuh ia ki sakhi bad ka jingshong bishar”.
“Da ka hukum ba hashuwa, ban pynthikna ia ka jingsted, ka jingbishar ba khlem shah liang, nga la shem ba ia ka jingdon jong ki sakhi lah ban pynduna bad shim beit tang ia kito kiba ki jingaisakhi kin long kiba donkam ban pynshisha ia ka mukotduma ban pynshitom khlem kano kano ka jingartatien bad ban ieh noh ia ki sakhi ki bym don jingmut” ong u CJ.
Ha ka por ba shong bishar, u DSGI Dr N Mozika ula pyntip ba u nongiasaid ain sorkar ula pynkhreh ia ka thup ki 492 ngut ki sakhi bad 28 ngut na ki, ki dei kiba la dep ban kylli jingkylli haduh mynta.
Ka hukum ka ong ba u nongiasaid ula pyntip ba u nongiasaid ain sorkar ula rai ban pynkut noh ia 200 ngut ki sakhi bad ban kylli jingkylli ia ki 292 ngut kiba sah, ha kaba 28 ngut ki dei kiba la dep kylli jingkylli.
Ka Iingkashari ka shim ruh ba naba ka thup ki sakhi ka dei ka bym pat lah ban rai da ka CBI, ia kane ka kam la nang pynjlan ha ka 20 tarik Rymphang 2025 sha kane ka sngi.
Ka Iingkashair kala buh ban shong bishar biang ia kane ka mukotduma ha ka 9 tarik Iaiong.
 ban aiti ia ka thup ba khatduh jong ki sakhi ka jyrsieh tah sia lieh ha ka thungkam nonghikai u snem 2009.){kind=link}