Shillong, Naiwieng 16 : Ka Iingkashari Meghalaya High Court hynne ka sngi Balang kala bthah ia ka Sorkar Jylla ba kan pynmih ia ka jinglut ha ka jingpynbha ia ki surok da ka ba shu lum pisa na ki kali ba kit mar palat pud lane khang noh shisyndon ia ka jingiaid jong ki.
“Donkam ban peitbha halor kane ka bynta, ban pynthikna ba ia ka jingpynlut haba pynbha ia ki surok la pynmih na ki kuna bala lum na ki kali ba kit palat pud lane tehlakam ia ka jingsniew ka surok da kaba khang syndon ia ka jingiaid ki kali” ong u Division Bench ha ka hukum bala pynmih na ka jingbishar ia ka PIL bala mudui da u Tennydard M Marak.
Ka Iingkashari kala ong ba ka jingjngai jong ki surok National Highway bad ki State Highway ha Jylla ki long da ki phew hajar kilometer bad ka jingdon tang 14 tylli ki weighbridge ka dei ka bym pat biang satia.
Kala ong baka jingbym lah jong ka Jylla ban tehlakam ia ki kali kit mar ba palat pud kala wanrah ia ka jinglutphut jong ka pla tyngka haba pynbha ia ki surok khamtam ba ka Jylla ka dei kaba ioh ia u slap ba jur.
Ka Iingkashari kaba buh ban bishar biang ia kane ka mukotduma ha ka 7 tarik u Rymphang.
