Bthah ka Iingkashari ban aiti hapoh 2 bnai ia ki jaka sha ka AAI ba kan pynheh ia ka Shillong Airport

Shillong, Jymmang 15 : Ka Iingkashari Meghalaya High Court ha ka sngi Palei, kala bthah ia ka Sorkar Jylla ban pyndep noh ia ka jingaiti ia ki jaka sha ka Airpot Authority of India (AAI) hapoh ka arbnai ba kan pynheh ia ka Shillong Airport,

Hadien ba shong bishar ia ka PIL, ka Iingkashari ba kynthup ia u Chief Justice IP Mukerji bad Justice W Diengdoh ha ka hukum kila ong “Ngi shu iohi bad bthah ba ia baroh ki jingdonkam ba hap ban pyndep ki dei ki kam jong ka Sorkar Jylla. Kaei kaba ka iingkashari ka rai ka long ba dei ban bud ia baroh ki jingdonkam ba hap leh, ka jaka dei ban aiti noh da ka Sorkar sha ka AAI ym duna ia ka arbnai na kane ka sngi”.

Hynrei kala ong “Lada dang don kano kano ka jingslem lane jingeh ban pyntreikam ia kane ka jingbthah, ka Sorkar ka dei ban wanrah sha ka jingtip jong ka Iingkashari lyngba ka aplikeshon hapoh ka arbnai. Lada donkam, ngi lah ban thung ia u Special Officer lane Committee ban pynkloi ia ka jingthied jaka na ki trai jaka da ka Sorkar, kiba dei ban aiti sha ka AAI”.

Ha ka jingshong bishar, u Additional Advocate General ula pyntip da ka jingkitkhlieh ban batai balei ba haduh mynta ym pat lah ban pyndep iaka jingthied ka Sorkar ia ka jaka ba donkam ban pynsted ia ka project. Ula pyntip ba ka kamban thied ia ki jaka kala sdang bad ong “ngi dang ap ia ka jingmynjur jong ka Kynhun Myntri kaba lah ban shim rai shen”.

U Deputy Solicitor General ula pyntip sha ka Iingkashari ba ki Ophisar na ka Ophisar u Director General of Civil Aviation (DGCA) kila pynlong ia ka jingialang bad ki bor pyniaid ka Shillong Airport haba iadei bad ki katto katne ki kam. Ia mynta, la paw ba ki don katto katne ki jingpynthut ia ka lynti iaid ki liengsuin sha ka Airport kaba dei ban weng da ka Jylla.

Halor kane, ka Iingkashari kala bthah ia ka Sorkar Jylla ba kan pynlong ia ka jingiasyllok bad ka DGCA bad ban leh ia kaba donkam hapoh ka por ba arbnai.

Nalor kane, ka Iingkashari kala bthah ruh ia ka Sorkar Jylla bad Sorkar Pdeng ba kin aiti ia ka kaiphod halor ki kam ba kila leh ha ka 15 tarik u Naitung.