Shillong, Nailur 21 : Ka Iingkashari Meghalaya High Court kala ai ia ka rai halor ka PIL ba bthah ia ka Sorkar Jylla ba kan pynthikna ba kam dei ban don ka jingpynlip ia ka bording sha ki Hospital bad ki Emergency Centre hapoh ka Jylla watla ka Jylla ka dang bteng ban pynlip bording ba katto katne kynta manka sngi.
Ka Iingkashari ha ka 20 tarik Nailur, kala pynmih ia kane ka hukum halor ka PIL bala mudui da u Nongtrei barim ka GHADC bad u Nongtrei monsngewbha Flaming B Marak, uba la leit mudui sha Iingkashari halor ka jingiai bteng ka jingpynlip bording hapoh ka Jylla.
Ka Jylla baroh kawei khamtam shabar ki jaka sor, ki dei kiba shah ktah bha ha kane ka jingpynlip bording kaba kaba dang bteng haduh mynta mynne.
Ka Iingkashari ka ong ba naba ka jingdon bording ha Jylla kala kham biang bad shibun ki sienjam la shim ha kaban pynkhlain ia ka jingpynsam bording, ia ka jingeh jong une u nongmudui la i kumba lah dep ban pynbeit.
Ka Sorkar Jylla ka dei ban pynthikna ba ki hospital bad ki emergency centre kim dei ban duh bording wat tang shi minit ruh namar ka jingduna ka bording, bthah ka iingkashari ha ka hukum.
