Bthah ka Committee u Justice Katakey ban leh survey na suin ia ka jingtih dewiong beain ha Jylla

Shillong, K’lyngkot 28 : Ka Committee u Justice BP Katakey (Rted) jong ka Iingkashari Meghalaya High Court, kala bthah ban pynlong ia ka survey na suin ban ithuh bad ioh jingkhein ia u dewiong bym pat khein bad kumjuh ruh ia ka jingtih beain.
La bynshet ha ka Agency shimet ba kan leh ia kane ka survey bad la aipor ba kan aiti ia ka kaiphod ba khatduh kynthup ia ki map ba bniah hapoh ka 28 tarik u Rymphang.
Haba iakren bad ki nongthoh khubor hadien ka jingialang, u Justice Katakey ula pynpaw ia ka jingdonkam ban leh survey bad ong “Ka Sorkar kala bynshet ban leh ia ka survey na suim ha ka agency shimet, bad ki nongmihkhmat jong ki ruh kila wan iashimbynta ha ka jingialang. Kila iasdang ia ka kam bad nga la bthah ia ki ban aiti ia ka kaiphod bad ki map hapoh ka 28 tarik Rymphang.
U pyntip ba ka Sorkar kala bynshet ha ka Meghalaya Basin Development Agency (MBDA) ba kan leh ia ka survey na suin ha ki hynriew tylli ki jaka ka South West Khasi Hills District.
U pyntip ba ka jingthmu jong kane ka survey ka long ban ithuh ia ki par ba dang shu tih thymmai bad ban khein ia ka jing don u dewiong.
“Ka MBDA kala shah bynshet ban leh ia ka survey suin ha ki 6 tylli ki jaka ka SWKH ban wad ia ka jingdon ki par ba dang shu tih thymmai bad ka jingdon u dewiong ha ryngkew. Kin sa iati ia ka kaiphod sha nga hapoh ka sngi Thohdieng” pynthikna u Justice Katakey.
Ula pyntip ruh ba ki don katto katne ki mining plans kila ioh jingmynjur kat kum ka Mines & Minerals (Development and Regulation) Act u snem 1957, hynrei ka jingtih dewiong bala ithuh da ka ain, kan dang ban sdang hapoh ka Jylla.
“Ha kane ka jingialang ba mynta, ngi la iakren ia ki sienjam bala shim da ka Sorkar ban pyntreikam ia ka jingbthah jong ka Iingkashari Supreme Court haba iadei bad ka khajna jong u dewiong ba tih beain. Wat hapdeng ka jingmynjur ia ki katto katne ki mining plan da ka Sorkar India hapoh ka act ba 1957, ka jingtih dewiong kat kum ka ain kan dang ban sdang ha Meghalaya. Kumta, kano kano ka jingtih dewiong ia mynta ka dei kaba leh beain suda” ong u Katakey.