Shillong, Lber 20 : Ka Single Member Committee bala thung da ka Iingkashari Meghalaya High Court kala ai jingmut halor ka jingdonkam ba ka Sorkar Jylla kan pyndep noh ia ka jingleh audit ia ka thymmei jong u dewiong bala pyndonkam da ki karkhana Ferro Alloy bad ki Captive Thermal Power Plant jong ki karkhana dewbilat bad ban leh eiei hapoh ka shibnai.
“La ai jingbthah ia ka Srkar ba kan shim ia ka rai ba khatduh haba iadei bad ki karkhana Ferro Alloy hapoh ka shibnai” ong u Justice BP Katakey ha ka interim report ba 21, kaba la aiti sha ka Iingkashari Meghalaya High Court dang shen.
Ka kaiphod ka ong ba ki kam leh audit ia ka thymmei u dewiong bala pyndonkam da ki karkhana coke ka dei kaba la pyndep bad la dei ai ia ki demand notice sha ki karkhana coke ha kaba ki karkhana coke hadien ba ioh pdiang, lait noh artylli kata ka M/s Jaintia Coke Pvt.Ltd bad ka M/S Abhi Coke Pvt.Ltd, kila siew ia ki khajna bad kiwei kiwei.
La ai jingbthah ia ka Tnad Mining and Geology ka Sorkar Meghalaya ba kan shim ia ki sienjam ba dei ban shim ha kaban pynioh ia ka pisa bala pynpaw ha ki demand notice na kine ki artylli ki karkhana coke.
Ka ong ba watla ka Tnad Mining & Geology kala ioh pdiang ia ka jubab halor ka show cause notice na baroh ki karkhana Ferro Allow, hynrei kine ki dang don hapdeng ka jingbishar da ka Tnad ba dei khmih.
Halor ka jingtreikam jong ki karkhana cole bad ferro alloy, ka Tnad Mining & Geology ka Jyla ka pyntip sha ka Single Member Committee ba ki karkhana coke ki ym shym la ioh ia ka Single Window Approval da ka Sorkar Meghalaya lane ka Consent To Establish (CTE) bad Consent To Operate (CTO) na ka MSPCB, kim shym la treikam shuh hapoh ka Jylla.
U Chairman bad u Member Secretary ka MSPCB kila pyntip sha u Single Member Committee ba wat ki karkhana coke ki bym pat pynthymmai ia ki CTO, ym shym la shuh shuh ia ki ban treikam.
