Shillong, K’lyngkot 06 : Ka Comptroller and Auditor General of India (CAG) kala bthah ia ka Khasi Hills Autonomous District Council (KHADC) ba kan weng kam noh ia ki 82 ngut ki nongtrei namar ka jingthung kam kaba khlem iaid kat kum ka Policy thungkam.
“Ka jingbym bud ia ka policy thungkam ka plie lynti sha ka jingthung jied briew. Khnang ban don ka jingthung kam kaba khlem shah liang ia ki nongwadkam, ka Council ka lah ban bud ia ki Rule thungkam. Kine ki jingthung kam, kiba long pyrshah ia ka Rule jong ka Council, ki dei ia ban khein iap ne pynduh noh” ong ka CAG ha ka kaiphod jong u snem ba kut ha ka 31 tarik Lber, 2019.
Ka KHADC Service Rules, 1961 ka teh kyndon ia ka jingthungkam bad jingpynkiew kyrdan ia ki nongtrei jong ka KHADC.
Ka Rules 3 ka kren shai ba ka jingthungkam ha baroh ki kyrdan ia ki nongtrei dei ban leh hadien ka jingpynbna laitkam bad ka jingpynlong ia ki eksam lane ka interview.
Ha ka jingbishar ia ki kot ki sla la shem ba ka KHADC kala thungkam ia 82 ngut ki nongtrei (permanent) ha ki kyrdan bapher bapher. Hynrei la shem ba kine ki 82 tylli ki kam ba lait ki dei kiba khlem da pynbna paidbah. Ka jingthungkam la leh tang da ka jingmynjur jong ka Executive Committee khlem da pynlong ia ka eksam ne interview, ong ka kaiphod.
Ka KHADC kala hap ban pynlut haduh T. 1.06 klur hapdeng u snem 2017-2019 tang na ka jingsiew tulop bad kiwei kiwei ki jingsiew sha kine ki nongtrei.
U Secretary ka EC, KHADC ha u Nailar 2022, ula pynpaw ba kat kum ki kyndon ba don ha ka Sub-Rule IV jong ka Rule 2 jong ka Chapter-I jong ka KHADC Service Rules, 1961, ka “Appointing Authority’ (ka bor thungkam) ka mut ia ka Executive Committee lane kino kino kiba la aibor da ka EC ba kan thungkam ha kino kino ki kam bad kyrdan.
Nalor kane, ka Sub-Rule XI jong ka Rule 2 jong ka Chapter-I jong kane ka Rules ka ong ba ka ‘Committee’ ka mut ia ka Executive Committee jong ka District Council ka United Khasi Jaintia Hills.
Haba pynshong nongrim halor kine ki rule, ka jingthungkam ia 82 ngut ha ki kyrdan bapher bapher kum ki Sub Inspector Tax, JAA bad kiwei kiwei, la leh da ka jingmynjur jong ka EC, KHADC kat kum ki kam kiba lait.
Ka kaiphod CAG kala ong ba ka jubab jong ka Council ka dei ka bym lah ban pdiang namar ka Rule 3 jong ka Chapter-III jong ka General Rules kaba teh kyndon ia ka jingthungkam bad jingkiew kyrdan ka ong ba ka jingthungkam ha baroh ki kyrdan (lait noh ka Compassionate (jaka kmie/kpa ba iap)/ Invalid pension case) dei ban leh hadien ka jingpynbna lait kam bad kaba da pynlong eksam bad interview.
 kala bthah ia ka Khasi Hills Autonomous District Council (KHADC) ba kan weng kam noh ia ki 82 ngut ki nongtrei namar ka jingthung kam kaba khlem iaid kat kum ka Policy thungkam.){kind=link}