Shillong, Nohprah 28: Ka Shlem sam jingiarap ia kiba duk naka ophis treikam U Rupang, haka sien ba 11 mynta ka sngi kala bteng biang ban sam jingiarap sha 8 tylli ki longïng kiba duk bad ba jynjar kiba la jied na kylleng ki shnong ka Ri Khasi-Jaintia.
Ia kane ka jingsam jingiarap la pynlong ha Mawkhar Christian Hr. Sec School Shillong ha ryngkat ka jingiadon lang kiba ha ïng ha sem, ki nongnoh synniang (contributors) bad ki katto katne ki ‘riew rangbah bad longkmie kiba ju don bad noh mynsiem lem ia kiba duk ba jynjar.
Kine ki longïng ki la ioh jingiarap da ki tiar khnang ban ioh pyndonkam ha ïng ha sem kum ki tusok, ki rajai, ki blanket bad ki tiar shet tiar tiew ban ioh pyndonkam ha ing ha sem.
Ki longïng kiba la shah jied mynta u snem 2022 ki long ka kong Nangroi Rymbai na shnong Musniang East Jaintia Hills, ka kong Melda Kshiar na shnong Pyngkya East Khasi Hills, ka kong Amhim Dkhar na Kyndong Tuber West Jaintia Hills, ka kong Monika Mukhim na Pingwait East Khasi Hills, u bah Teiborlin Dkhar na Nongstoin West Khasi Hills, ka kong Aita Kurbah na Ksehmawnai East Khasi Hills, ka kong Plibon Kharmawphlang na Mawpynthih bad ka kong Mary Kurkalang na Mylliem Mawrashe East Khasi Hills.
Ha kane ka sngi sam iaki jingiarap sha ki lolngïng ba duk la sakhi lang ruh da ka kong Josaphia Wankhar ka ba dei ruh ka Chief Executive Officer (CEO) jong ka Shillong Co-Operative Urban Bank Ltd, Shillong.
Ha ba kren ha kane ka sngi ka kong Josaphia Wankhar ka la pynpaw bad ai ka jingiaroh ia Ka Shlem jingiarap ia kiba duk u Rupang kaba la lah ban iai bteng ia kane ka kam haduh 11 snem kynthih mynta.
Ka kong Josaphia ka la ong ban ai ia kino kino ki jingai sngewbha ia ki briew kiba kim ju ioh mad, ka pynkmen bad pynphuhmut phuhmat shisha ia ka mynsiem ha ka jingim jongki hynrei ha ki briew kiba la ioh pahuh pat, ki jingai sngewbha kyrpang kim da don dor than’.
Kala ai mynsiem ia kane ka Shlem ba kan iai bteng ia kine ki kam shakri mon sngewbha (noble mission) ia ki longïng kiba duk khnang ba kan long shisha ka jingkyrkhu ia ki.
Ia kane ka jingialang la pyniaid ia ka jingialang sam tiar da u bah R M Shabong uba long ruh u Editor bad Publisher ka kot khubor U Rupang uba la kyntu ia ki nongioh jingiarap (beneficiaries) ba ki dei ban pyndonkam hok ha ing ha sem jongki ia ki tiar ki tar ba ki la ioh khlem da pyndonkam bakla satia ia ki da kumwei pat.
