Imphal, Jylliew 17: Ka jingiakynad haka jylla Manipur kala nang jur bad ki khubor kila saphriang ba kala don ruh ka jingpyndonkam da ki tiar siat kiba khlain bor ha Kwakta kaba hap ha Bishnupur District bad ha Kangvai kaba hap ha Churachandpur District kiba dei ki jaka, kiba ka jingiakynad ka jur bha ha ka miet jong ka sngi Thohdieng.
Na ka liang jong ki Army, Rapid Action Forces bad ki pulit Manipur kila iaid iaka Flag March ha Imphal East District haduh ka por shiteng synnia jong ka sngi Thohdieng.
Kila don ruh ki khubor, ba kila don ki jingjia ba ki paidbah kila ialum bun bad thmu ban wiangding bad ban pynjulor ia ki jingdon jingem.
Ki khubor kiba la iohlum kila iathuh, kumba 1000 ngut ki paidbah kila ialum ha ka sngi Thohdieng bad kila pyrshang ruh ban leit wiangding bad ban pynjot pynpra ia ki jingtei bapher, hynrei ki bor pahara kila siat da ki Tear Gas ne lyer pynsat khmat bad ki Rubber Bullet ne ki kuli jri ban pynpra ia une u paidbah bad ha kane ka jingjia ar ngut ki riewpaidbah kila mynsaw.
Katkum ki tyllong khubor na ki pulit la iathuh ba ki paidbah kila thmu ruh ban pynjot pynpra ia ka iingsah jong u President ka BJP u Adhikarimayum Sharda Devi ha Imphal West ha ka miet jong ka sngi Thohdieng hynrei ki shipai bad ki RAF kila lah ban tem noh ia kane ka jingthmu bad kine ki paidbah kila phet noh na katei ka jaka kaba kila ialum baroh.
Ka jingiakynad hapdeng ki ar tylli ki jaidbynriew ha Manipur kala nang sniew bha ha kine ki khyndiat sngi kiba la leit, ha kaba ki iing jong ki nongialam seng saiñ pyrthei kila shah wiangding.
Dang shen kumba 1200 ngut ki paidbah kila kawang da u Petrol Bomb iaka iingsah jong u Myntri ka Sorkar Pdeng u RK Ranjan Singh.
