Nongstoin, Nailar 26 : Ka seng Hynniewtrep Youth Council –West Khasi Hills, kala rai ban boycott ne pynsangeh ia ka jing khaii ia ka dewbilat TOPCEM ha West Khasi Hills namar ka jingjia shah thombor ki paid nongiakhih pyrshah ia ka jingthmu pynheh kane ka kompani ia ka karkhana ha Thangskai, East Jaintia Hills.
Ka HYC-WKH hynne ka sngi Saitjain, kala sam ia ki shithi lyngba ki Unit ba kynthup ia ka Nongstoin, Mawshynrut, bad Rambrai Circle sha ki nongkhaii dewbilat hapoh ka District, ba kyrpad ia ki ban sangeh noh ha kaban shim ne die ia ka dewbilat TOPCEM.
“Kum ka seng ngi pang ka mynsiem ban iohi ia ki parari ki paradoh kiba shah khnoit bein, kiba shah lehbein bad kiba shah shoh shah bom ha ki Pulit lyngba ka jingkynshoit ki trai bad ki nongtrei katei ka karkhana dewbilat ha Thangskai ki bym khein shuh ia ki Kynthei haduh ba bun kila mynsaw” ong ka kyrwoh na u President Lumlang Kharsyiemlieh bad General Secretary Wantei Lyngdoh.
“Ngim lah ban shu sngap, kumta ngi kyrpad ia phi ki nongkhaii dewbilat ka thain ba kin sangeh noh ban shim ne die ia ka TOPCEM kaba la pynmih na Lumshnong, East Jaintia Hills District” kala bynrap.
Ka HYC ka ong ba da ka jingkyrshan jong ki nongkhaii dewbilat, ka sngew ban ong ba katei ka kompani kan ym iohlad shuh ban leh baheh bad kajuh ka pork an pyntlot noh ia ka jingioh kamai kaba shu kjit na ki trai shnong ka Jylla.
Ha kajuh ka por, mka HYC-WKH ka buh jingkylli ia ka Tnad Pulit ka East Jaintia Hills ba hato kila shah pyniaid ha ka TOPCEM haduh ba kim salia ban shoh bad bom ia ki paidbhur kiba iakhih ban iada ia ka mariang bad ki jingmyntoi jong ki trai shnong.
Ka Seng ka kyrpad ruh ia ki paidbah ka West Khasi Hills ba kin ym thied shuh ia ka dewbilat TOPCEM.
Pule ruh: Manipur: Pyntip ba Myntri Kuki ban pep wan Iingdorbar namar ka jingbym sngew shngain
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
