Guwahati, Nailur 01: Ha kawei ka jingjia kaba pynher syrngiew, uwei u rangbah la kynnoh ba ula shah bom iap ha u paidbhur hapoh Dhemaji district ka Assam hynnin ka miet sngi Balang halor ka jingsuba ba u dei u nong rahbor khynnah. Watla katta ia une u briew ym pat shym la ithuh satia.
“Ngi la ioh jingtip ha ka por kumba 7:30 mynmiet ba kala don ka kam bom shnong pyrshah ia uwei u briew. Hadien ba ki pulit kila wan poi ha katei ka jaka, une u briew ula don lypa hapdeng ka jingmynsaw kaba jur bad hapdeng ka jingbym tip briew,” ong ka lad pathai khubor kaba la shim ia ka jingkren jong u Deputy Superintendent of Police (headquarters) ka Dhemaji, u AT Doley.
U Doley ula ong ruh ba ia une u briew la pynkit noh mardor shapoh ka hospital kaba marjan hadien ba la pynbna ba ula dep khlad noh.Katkum ki khubor la iathuh ba une u briew ula rah ia iwei i khunlung na ka jingkdup jong ka kmie hadien ba kane ka briew ka la pyrta jingiarap.
Hadien ba ki nongshog shnong kila ioh sngew ia ka jingpyrta jong kane ka briew, shibun bah ki paidbah kila ia mih bad thombor ia une u briew.
Ha ka jingtohkit la shem ba une u briew u dei u bym biang satia ha ka bor pyrkhat pyrdain mynta lah 15 snem kynthih.Halor kane ka bynta, ki pulit kila rejistar case kam pyniap bad kem noh ia hynniew ngut ki briew na ka bynta ban pynlong ia ka jingtohkit.
Ha u bnai Nohprah jong u snem ba la dep, u Myntri ka Parliamentary Affairs u Pijush Hazarika uba la mih ha ka jaka jong u Myntri Rangbah (CM), ha ka sngi kaba nyngkong jong ka dorbar tlang ula ong ba ka jylla ka pynkhreh ban thaw ia ki kyndon ain kiba thmu ban khanglad ia ki kam bom shnong.
Ka jingphai khmat sha kane ka bynta kala wan long hadien ba u MLA ka party synshar, u Mrinal Saikia ula rah ia kane ka mat halor ki kam bom shnong ha ka jylla hapoh ki kyndon Rule 54.
Une u MLA ula rah ia kane ka mat hapoh ka iingdorbar hadien ki jingjia shah bom shnong kiba la jia hapoh Assam, kata khamtam hadien ka jingjia ba dang shen ha Jorhat ha kaba uwei u briew ba la tip kyrteng kum u Animesh Bhuyan ula shah bom iap ha u paidbhur.
Kumjuh ula kdew ruh hlor ka jingshah bom iap jong u Abhijeet Nath bad u Nilotpal Das ha Karbi Anglong kaba la jia ha kine ki ar snem ba la dep.
Une u MLA ula ong shuh shuh ba khnang ban khanglad ia kiba bun kine ki jingjia nangne shakhmat, yn shim ia ki lad jingpynshitom kiba tyngeh pyrshah ia kito ki briew kiba donkti, bad na ka liang ka sorkar ka dei ban wanrah la ka jong ka ain. “Ki kam bom shnong kim dei satia ki bynta jong ka kolshor jong ka Assam,” ong shuh shuh u Saikia.
