Shillong, Jylliew 20 : U Chief Executive Member (CEM) ka thymmai ka KHADC Bah Pyniaid Sing Syiem ula bhah haduh 9 tylli ki shuki Executive Member sha ka National Peoples’Party (NPP) bad arngut sha ka seng Indian National Congress.
U CEM ula phah hynne ka janmiet sngi Ba-ar, ia kane ka thup kyrteng ki dkhot ka Executive Committee sha u Lat ka Jylla ba un ai jingmynjur.
Une u Nongialam ka kynhun synrop Khasi Hills Democratic Front (KHDF) ula tyrwa ia ka kyrteng u CEM barim bad MDC ka Congress na Mawkhar-Pynthorumkhrah Bah PN Syiem kum u Deputy Chief Executive Member (DyCEM) ka Council.
Nalor kane ka shuki, uwei pat u MDC ka Congress ba don ha ka thup kyrteng ki dkhot ka EC u dei u MDC ka Mawkyrwat Bah Carnes Sohshiang.
Ka NPP kaba la shim halade ia 9 tylli ki shuki EM kala pynneh ia baroh 6 ngut ki EM kiba don ha ka EC bala leit noh jong ka UDA ba ialam da ka UDP bad kine ki dei u Bah Gigur Myrthong, Kong Grace Mary Kharpuri, Kong Macdalyn Sawkmie Mawlong, Bah Rangkynsai Kharbuki, Bah Teiborlang Pathaw bad u Bah Victor Ranee.
Ki arngut kiba dang shu ioh thymmai ki dei u MDC ka Mawsynram Bah Alvin K Sawkmie uba la iehnoh na kam DyChairman bad u MDC ka Laitumkhrah Bah Fantin J lakadong.
Lah ban kdew hangne ba ka Congress nalor ka shuki DyCEM bad EM, kala ioh ruh ia ka shuki DyChairman kaba la bat da u MLA/MDC ka Mawhati Bah Charles Marngar.
