Shillong, Nailar 14: Ka Tnad Social Welfare kala shim ia ka rai ban thungkam ha ki 14 tylli ki Post ban pynthikna ba kan don ka jingtreikam kaba biang bad kaba ryntih ha kaba iadei bad ka jingpyntreikam iaka Child Helpline Service ha ka jylla Meghalaya.
U Myntri ka tnad Social Welfare u Bah Paul Lyngdoh haba iakren bad ki nongthoh khubor hynne ka Lah Sngi U Blei, ula ong, “Nga dap da ka jingkmen ban pynbna ba ngi la lah ban pynkhlain iaka Child Helpline Service (1098) da kaba mang na ka bynta 14 tylli ki Post, kaban iarap ha kaban pyniaid ryntih ia katei ka jingai jingshakri”.
Ula iathuh ba ia ka Child Helpline Service la khmih bad peit tang da iwei I
Child Helpline Administrator.
“Kadei ka jingjop kaba khraw ia ka tnad namar ba ia katei ka jingai jingshakri la pyntreikam biang ha u snem 2019 tang da iwei I nongtrei bad phi lah ban mutdur ia ka jingjop ha ka rukom ai jingshakri” ong u Myntri Sorkar.
Ki 14 tylli ki Post kiba thymmai ki kynthup 1 IT Supervisor, 10 ngut ki Call Operator, 1 Nongtrei ban trei bun jait ki kam bad 2 ngut ki Security Guard.
“Mynta haba ngi lah don 10 ngut ki call operator, ka mut ba ka rukom ai jingshakri kan sted bha bad lada don kino kino ki jingujor ki lah ban poi kloi sha kine ki Call Operator bad lyngba kane, ngin lah shisha ban iarap ha ka lynti kaba biang bha ia kito kiba don hapdeng ka jingeh bad jingshem lanot” ong u Bah Paul.
U Bah Paul ula iathuh ruh ba ka tnad sorkar kala pyntreikam biang iaka Women Helpline ‘181’.
“Nga kyntu ia phi ba phin ia leit khmih khnang iaka ophis treikam jongka Directorate, namar ngi lah dep ban buh ia ki tiar ki tar kiba thymmai bad ia ki kor ki bor kiban iarap ha kaban lapdien ia ki ‘Call’ kiba ngi iohpdiang bad ban lapdien ruh ia ka Response System bad ka don ruh ka Website kaba la dep ban pyntreikam biang ban pynthikna ban lah ban ai iaka jingshakri kaba bha tam” la pynkut u Myntri Sorkar.
