Nongstoin, Naitung 16: Ka Khasi Students’ Union (KSU) hynne ka sngi Ba-ar, kala beh krad haduh 26 ngut ki nongbylla bar jylla kiba wan bylla ban trei ia ka surok Nongstoin-Rambrai-Kyrshai namar ka jingbym don ia ka Work Permit.
Ka KSU-West Khasi Hills bad Rambrai Circle bala ialam da u Organising Secretary Wanbhakupar L Nonglait, ka pyntip ba kine ki nongbylla bar jylla ki dei kiba la wanrah da ka kompani Spica, kaba pyntrei ia ka project shna surok ka NHIDCL na Nongstoin-Rambrai-Kyrshai.
Ka KSU ka pyntip ba ha ka jingkhynra la shem ba 26 ngut na ki nongbylla kila pynkhein ia ka Inter-State Migrant Workmen Act, 1979 (Work Permit) kaba la pyntreikam ha Jylla naduh u snem 2011. La pyntip ba 6 ngut na kine ki nongbylla kim shym la lah ruh ban pyni ia ki kot ki sla ki ban pynshisha ba ki dei ki nong India.
Ka KSU kala maham jur ia ki contractor ba ki dei ban pynbiang ia ki work permit jong ki nongtrei bar jylla ba ki wanrah ban pyntrei ha ka thain lem kumta ka seng kan shim da ki lynti kiba tyngeh.
Kala pyntip ruh ba ka seng kan dang iai bteng ban pynlong ia ki jingkhynra ha kylleng ki jaka jong ka District ban pynthikna ia ka jingtreikam pura jong ka ain Inter-State Migrant Workmen Act, 1979.
Lah ban kdew hangne, ka KSU kala pynieng ruh haduh 3 tylli ki khyrdop Inner Line Pemit (ILP) ha kylleng ki jaka rung jaka mih ka Jylla ban pyrrkhing ia ka rung ka mih ki bar jylla.
Kine ki khyrdop ki kynthup ia kawei ka Athiabari, West Khasi Hills, kawei ka Pahammawlein, Ri-Bhoi bad kawei ka thain Umstain, East Jaintia Hills District.
Ka KSU kala shim ia kane ka sienjam ban pynbor ia ka Sorkar ba kan pyntreikam noh ia ka Inner Line Permit (ILP) bad ka Meghalaya Residents Safety & Security Act hapoh ka Jylla.
 hynne ka sngi Ba-ar, kala beh krad haduh 26 ngut ki nongbylla bar jylla kiba wan bylla ban trei ia ka surok Nongstoin-Rambrai-Kyrshai namar ka jingbym don ia ka Work Permit.){kind=link}