Nongstoiñ, Nailar 16: Ka HYC – Nongtrai Circle kala behkrad ia bun ngut ki nongbylla bar jylla kiba khlem kot khlem sla, kiba kynnoh wan bylla be-ain ha ki kharkhana dieng ha ka thain Jynru Niangbrak.
Ia kine ki bar jylla la beh ha ka jingkhynra jong kane ka Seng ha ka sngi Saitjain hapoh ka jingialam u President samla Blaster Sohmad bad Secretary samla Spailin Wanniang.
U samla Blaster Sohmad, u la ong, “Ka jingma ka ap ïa ka jaidbynriew na ka jingioh wan rung laitlan ki bar jylla, namar ngi ïohi lyngba ki lad pathai khubor ba ki don haduh 150 phew tylli ki longïing kiba la shah kyndang na ka sorkar Assam”.
“Ngi hap ban long kiba peitngor ïoh ba kine ki bar jylla kin wan rung bad buhai shnong sha kane ka jaka bad ka ri baieid jong ngi. Nangne shakhmat ngin ïai khynra bad buddien na ka por sha ka por” ula ong.
“ Ka HYC kan ïai bteng ban khynra bar jylla ha ka thaiñ ban ïada na ka jingshah tyllep ha ki bar jylla”, u la bynrap.
