SHILLONG, Risaw 07: Ka seng Hynniewtrep Achik National Movement (HANM) South West Khasi Hills District ha ka 30 tarik Nailur kala leit ban khynra bad beh krad ia ki nongtrei bar jylla kiba don ha ka karkhana thang dewiong ka M/S Nimon Enterprise kaba don ha Umsynrang ha Nongjri.
Na ka liang ka seng ka kwah ban pynshai ba hadien ba ka seng kala wad bniah la shem ba u bah Gigur Myrthong MLA jong ka Mawshynrut um don bynta ei ei bad katei ka karkhana thang dewiong kumba la kam da u Manager jong ka karkhana.
Ka seng ka pynpaw ba lada long trai da u trai jylla ia kane ka karkhana M/S Nimon Enterprise u Manager ruh un jin da la iathuh ia ka kyrteng jong u trai shisha bad ki nongtrei ruh kin nym shah beh.
Ka seng ka pynpaw ba kan nym shong kli kti hynrei kan dang iai wad ia ki kyrteng ban pynthikna ba kan nym don kano kano ka jingia trei benami hapoh ka jylla.
“Kane ka dei tang ka jingsdang ba ka seng kan khynra ia ki ba trei benami ym tang ha South West Khasi Hills hynrei ha kylleng ki bynta jong ka Ri Khasi Jaintia namar ka seng kam kwah ban iohi ba ki briew ka jylla kin shah pyndon kam bakla” la ong ka kyrwoh ka seng.
