Shen yn plie ïa ka Shlem sa ha Khliehriat East Jaiñtia Hills
Nongstoiñ, Ïaiong 30: U Bah Michael Thongni, Managing Director bad Chief Executive Officer (CEO) ka Northeast Institute of Professional Studies (NeIPS), ula ai jingmut ia ki Samla ka Jaidbynriew da kaba ong “ lada ngi kwah beh ia ki nongwei, ngi dei ban beh ym da ka wait, ka suloi ne u khnam ha kane juk hynrei ngi dei ban ialeh da kaba knieh ia ki kam ki jam ba kin ym lah im jakpoh”.
Kat kum ka jingong jong u, ka jingwan ki nongwei sha kane ka Jylla ka dei namar ka jingwan kamai jakpoh haba iohi ia bun ki lad ki lynti ban kamai. “Kumta, ngi dei ban shimkabu ia ki lad ki lynti baroh ban kamai ban nym iohlad shuh kiwei”.
Une u Rangbah ula kren ia kine ki kyntien ha ka prokram “Startup tools distribution, Awareness and Financial literacy program” jong ka NeIPS ba long ha ka sngi thohdieng ha Pormawthaw, West Khasi Hills District, kaba la pynshongkun da ka jingiadon ryngkat ka Kong Phila Nongkynrih, DDM, NABARD kum ka kongsan.
Ha kane ka sngi la sam ia ki tiar ki tar mistiri sha ki Rangbah bad samla kiba la pyndep ia ki jingshah hikai pyntbit ban trei mistiri da ka jingkyrshan ka National Bank for Agriculture and Rural Development, Meghalaya Regional Office (NABARD).
U Bah Michael Thongni ha kane ka sngi ula pynbna ruh ba ka NeIPS ka don ia ka jingthmu ban pyniar ia ka lyngkha treikam jong kane ka shlem sha kylleng ki jaka ka Jylla. U pyntip ba dang shen, ula ioh iaka phone call na ki samla na Khliehriat kiba la kyrpad ia u ban wanplei lang ia ka shnat jongka NeIPS ha Khliehriat.
“Nga la kular ban sa plie noh ia ka shnat ka NeIPS ha Khliehriat ha u bnai ban wan khnang ba ki samla kiba iohi ia ka jing kyrshan ha ka NeIPS kin ym rit mynsiem bad ba kin ioh jingshikai kumno ba kin ieng hala ki jong ki kjat da kaba seng kam lajong” ila ong.
“Ka jingthmu kaba hakhmat eh jong ka NeIPS ka long ban law noh ia ka jingkyrduh kam jong ki samla ha Jylla” ula bynrap.
Ha kane ka sngi la pynlong ruh ïa ka jingpynshai shaphang ki jingmyntoi kiba ka Tnad Labour ka ai sha ki nongbylla sngi na ka Kong Patricia Warjri, LDA, Labour Dept, West Khasi Hills District bad la ïoh ruh ïa ka jingpynshai na ka liang u Bah Wilfred Dohling, BM, MRB, Riangdo ïa ki jingmyntoi kiba lah ban ïoh na ka MRB haba don ka jingthmu ban shim ram.
