Shillong, Iaiong 26: Ki pulit jong ka East Khasi Hills kila ioh ban daiñ kuna haduh T.2.46 lak hadien ba kila ioh bat haduh 194 ngut kiba la pynkhein ia ki kyndon niah kali, ha ka jingkhynra kaba la pynlong ha Shillong ha ka miet sngi Saitjain bad ha ka step phyrngab Sngi u Blei.
Ia kane ka jingkhynra la pynlong da ki pulit jong ka Sadar, Laitumkhrah bad Lumdiengjri bad la pynlong ia kane ka hapoh ka jingialam jong u Superintendent of Police ka East Khasi Hills, u SP (City/Traffic) bad u Additional SP Traffic.
“Ia kane ka jingkhynra la pynlong khnang ban pynjur ia ka rukom treikam ha kaban tehlakam ia ki nongpynkhein ia ki kyndon niah kali bad ka rukom niah ka bym shngain ha ki surok lyngba ka jingiatreilang, ka jingkhmih bniah ha kylleng ki jaka khamtam eh ha ka por mynmiet kaba jur bha ka jingpynkhein ia ka rukom niah kali” la ong ki pulit.
La pynleit jingmut bha ha kaban pyrkhing ia kito kiba niah kali hapdeng ka jingshoh khawiang, ka jingshna ne modify ia ki kali bad ia ki jingpyndiat ia ki jingthaba ne lights, ka jingtah iit ïong ki kali ha ryngkat bad ka jingkhmih bniah ia ki kot ki sla bad ia kiwei pat ki jingpynkhein ia ki kyndon jong ka Motor Vehicles Act.
“Ha kane ka jingkhynra, kila don 194 tylli ki jingpynkhein kyndon kiba la iohbat bad la lah iohlum na ka jingdaiñ kuna kaba kot T. 2,46,000” la bynrap ki pulit.
Palat 100 ngut ki pulit kila mih ban iahsimbynta ha kane ka jingkhynra da ka jingiashimbynta ruh jong ki baroh ki In-Charge jong ki Tnad Traffic bad ki Officers-in-Charge jongki Police Stations.” Ha man la ki Naka Point la khmih da ka jingialam ki heh pulit ophisar ban pynthikna ba kan don ka jingiatreilang bad ka jingiaid ryntih ha baroh ki liang”.
Ki pulit kila ong, ba kane ka jingkhynra ka pyni ia ka jingiai bteng ka jongki ban shim ia ka jingkitkhlieh na ka bynta ban pynneh bad pyni ia ka jingdon ka jongki ha kaban trei ia ka kam da ka jingthmu ban tehlakam ia ki nongpynkhein aiñ bad pynthikna ba kidei ban kohnguh bad ban kyntiew ia ka jingshngain ha ki surok ha kylleng jong ka district.
