Nongpoh, Jymmang 03: Ka Khasi Student Union, bad RBYF Umsning Circle hynnin ka miet sngi Ba-ar, kila ioh ban bat ia 14 ngut ki bar jylla kiba wan rung khlem kot khlem sla sha Jylla, kaba long pyrshah ia ka ain Inter State Migrants Workment (Regulation of Employment and Condition of Service) Act 2011.
Ia kine ki bar jylla la ioh ban bat na kawei ka trok ha ka jingtalasi kali ha ka thain Umsning, kaba la pynlong halor ka jingioh khubor ba ka don ka trok ba wan kit ia ki bar Jylla na Assam.
Kine ki Seng hapoh ka jingialam u President ka KSU Umsning samla Lester Nongbet bad President ka RBYF samla Balakmen Nongbri kila pynlong ia ka jingtohkit kaba jur ia kitei ki bar jylla bad shem ba ki dei kiba wan rung beain khlem ki kot ki sla.
Halor kane ka jingshem, kine ki seng kila aiti noh ia kine ki briew sha ki Pulit ka Umsning Police Outpost ba kan leh ia kaba donkam.
