Bat ka HYC ia 4 ngut ki nong Bangladesh na Shella | Dawa tuklar ia jingwan buhai shnong ha Jylla

Shillong, Iaiong 21: Ka Hynniewtrep Youth Council (HYC) hynne ka sngi Nyngkong, ka la ioh bat ia 4 ngut ki suba nong Bangladesh na ka shnong Shella, East Khasi Hills kaba don ha khappud ka Ri Bangladesh bad ka la dawa na ka Sorkar Jylla ba kan tuklar halor ka jingjur ka jingwan buhai shnong beain ki nong Bangladesh sha kane ka Jylla.

Haba pyntip ia kane u president ka HYC u Bah Roykupar Synrem u la ong “Mynta ka sngi ha ka por kumba 8 baje mynstep ki dkhot ka HYC Shella unit ki la ioh bat kem ia 4 ngut ki suba nong Bangladesh kiba wan na Dalia kaba don hajan ka jingker sainar ha khappud bad ka Ri Bangladesh kiba wanpoi hynnin ka miet bad haka jingtohkit kila ong ba ki wan na Shillong. Kine ki briew ki don EPIC, Aadhaar bad PAN Card napoh ka Jylla Assam ban kam ba kidei ki nong shong shnong ka India”.

“Kine ki briew kiba la suba ba ki dei ki nong Bangladesh ki la kam ba ki wan sha Dalia kum ki nongjngohkai pyrthei hynrei watla katta ruh kim shym la lah ban ai kyrteng ïa ka trai ïing ba ki la sah hynnin ka miet. Kine ruh kim shym la lah ban ïathuh da kano ka kali ki wan sha katei ka shnong” la ong u Bah RoRo

U Bah Roy u la pyntip ba hadien ka jingtohkit bniah, la lap ba uwei napdeng ki 4 ngut u don ar tylli ki EPIC card kiba don ia ki kyrteng Samchul Hoque bad Samchul Bor kiba la ai ha kajuh ka tarik da u electoral registering officer jong ka Nagaon district, Assam.

“Kane ka la wanrah ïa ka jingartatien kaba jur ha ka jingmut jingpyrkhat jong ki dkhot ka HYC. Hadien ba la dep ban peit ïa ki phone jong ki, kawei na ki dur ba ki don ka dei ka pisa jong ka ri Bangladesh, hadien ba kim shym la ai l ïa ka jubab kaba sngewhun ban pynthikna la kidei ne em ki nong India, ki dkhot jong ki la aiti ïa ki sha ki pulit ka Shella” u la ong bad u la bynrap daka ba ong “Nga la iakren bad u SP ka East Khasi Hills district bad u la pyntip ba u la phah ia u SDPO ka Sohra sha Shella PS ban tohkit ban lap ia ka jingshisha, la kine ki briew ki dei ne em ki nong India”.

“Ha ka jingtohkit, u SDPO u la ong ba kine ki briew ki la pyntip sha ki pulit ba haka jingshisha ki dei ban leit sha NEIGRIHMS ban ïoh jingsumar hynrei kim lah ban ïathuh kumno ki la poi sha Shella kumta kata ka dei kaei kaei kaba la pynmih shibun ki jingartatien ha ka jingmut jingpyrkhat jong ngi bad ka tnat pulit. Haba iadei bad kane ka Sorkar bad ka tnat Pulit kidei ban shim khia bha ïa kane ka kam da kaba pynlong ïa ka jingtohkit kaba bniah bha” u la ong.

Haba pynpaw ia ka jingsngewkhia halor ka jingwan rung be-ain sha kane ka Jylla, u Bah Roy u la ong ba ha kine ki khyndiat taiew ba la dep ka HYC ka la ioh jingtip na ki tyllong khubor bad na ki briew kiba shong ba sah ha khappud ba ka la don ka jingjur bha ka jingiaid lynti jong ki briew na Bangladesh kiba wan rung sha ki jaka jong ka Ri India.

Haba ïadei bad ka jingkren jong u Myntri ka tnat kam pohïing ka Sorkar Pdeng u Amit Shah halor ka jingwan rung ruh ki nong Bangladesh sha India lyngba ka West Bengal kiba la biang lypa ki kot ki sla, u president ka HYC u la ong, “Lada kine ki briew ki lah ban ïoh ïa ka EPIC, Aadhaar lane Pan Card na West Bengal lane Assam lane na kano kano ka Jylla te ki lah ban rung da kaba suk sha Meghalaya”.

“Ngim kwah ba kan jia kumta hapoh Meghalaya bad kumta ngi khot ia ka Sorkar Jylla ba kan shim khia bha ia ka mat jong ka jingwan buhai shnong ki nong Bangladesh. Lada ym shim ia ki sienjam, ngi sheptieng ba kan poi ka sngi ba kine ki briew kin ioh ia ka jaka sah ba pura ha ka Jylla Meghalaya bad kin long ki nongthep vote bad kin ioh ia baroh ki hok bad ki jingmyntoi kum ba ioh ki trai shnong” u la bynrap.

Nalor kane u president ka HYC u Bah Roy u la pyntip ba ka COMSO ka la thoh sha u Myntri Rangbah ka Jylla ha kaba ia dei bad ka jinglong jong ka ILP bad ka MRSSA Amendment bill, 2020 bad haduh kine ki sngi ka COMSO kam pat ioh ia kano kano ka jubab na u Myntri Rangbah.