Shillong, Risaw 31 : U Nongaibuit ka Tnad Social Welfare Bah Paul Lyngdoh ula pynbna ba ka Sorkar jylla kala rai ban pynioh Anganwadi Centre (AWC) sha baroh ki Shnong bym pat ioh hapoh u Lber 2026.
Ia kane ka rai la shim ha ka jingialang bishar kam bala pyniaid da u Myntri Rangbah Conrad K Sangma myn ha ka 29 tarik Risaw, kaba la iakren ia kiba bun ki kam bad ki prokram bala pyntrei da ka Tnad Social Welfare.
“Ha kane ka jingialang, ka rai kaba la shim ka long ba baroh ki Shnong ki bym pat ioh Anganwadi Centre kin sa ioh noh. Ngi don kumba 1700 tylli eiei kum kine ki shnong. Ia mynta, kila don haduh 6000 tam ki AWC bad ki 1700 ba sah yn sa pynioh noh hapoh u Lber 2026, kaba mut ba baroh kawei ka Jylla kan sa don ia ki Anganwadi Centre” ong u Bah Paul haba iakren bad ki nongthoh khubor ha ka sngi Thohdieng.
Ula pynbna ruh ba ka Asian Development Bank (ADB) kala bei pisa ba T.20 klur shisnem ban kyrshan ia ka Supplementary Nutrition Programme (SNP) ha Jylla.
“Ka SNP jong ka Sorkar Meghalaya kan nang kham heh shuh shuh da ka jingbynrap shuh shuh ia ki mar bam ki bym pat shah kynthuh ha ki jingbam bala buh bad sam lyngba ki Anganwadi Centre. Namar kane, ngi sngewkmen ban pynbna ba ka ADB kala dep wan shakhmat ban kyrshan ia ka Sorkar Jylla da ka jingbei pisa ba T.20 klur shisnem na ka bynta ka SNP ba kynthup ia ki jingbam bala shet (HCM) bad ki marbam ba ai rah sha Iing” ong u Bah Paul.
Ki AWC kin ai ia ki jingbam ba dang shu ih arsien ha ka shisngi ryngkat bad artylli ki pylleng ha ka shitaiew ia ki khynnah kiba hapdeng ka 3-6 snem ka rta.
Une u Nongaibuit ula pynbna ruh ia ka jingthmu jong ka Sorkar ban kyntiew kyrdan ia ki 2000 tylli ki AWC da ki solar panel bad ban aiti ia ka jinglong trai na ka Sorkar sha ki Shnong.
Ban pynkhlain ia ka Early Childhood Care and Education (ECCE), u Bah Paul ula ong ba ka Sorkar kan sa thaw ia ka post jong ka kam Lady Supervisor, ka ban tip kum ka Assistant to Child Development Project Officer (CDPO).
U Myntri Rangbah un sa leit ban jurip man ka lai bnai ban bishar ia ki jingtreikam jong ki Centre.
Ka Sorkar kala mynjur ban thungkam ia u Nutritionist u ban sa leit lum nuksa ia ki jingbam bad ai kaiphod sha ka Sorkar, bynrap u Bah Paul.
