Guwahati, Nohprah 13 :U khliehduh ka Rashtriya Swayamsevak Sangh (RSS), u Mohan Bhagwat ha ka 11 tarik mynta u bnai ula ong ba baroh ki shnong hapoh ka ri India ki dei ban don ia ka tnat treikam jong ka RSS bad man uwei pa uwei u dkhot uba la pynrung kyrteng hapoh jong ka ki dei ban trei na ka bynta ka roi ka par jong ka ri.
Haba aijingkren ha ka sngi pynkut ia ka prokram ki nongtrei jong ka RSS ka Assam Unit ha Assam, une u heh ka RSS ula ong ba ka ri ka dei kaba kongsan tam na ka bynta baroh ki nongshong shnong khlem da khein ia ki jingiapher hapdeng jong ki.
Ka jingkren jong une u heh ka RSS ka ong; “U (Bhagwat) u pynpaw ba baroh ki shnong hapoh India ki dei ban don ia ka Shakha (tnat) namar ka imlang ka sahlang hi baroh kawei kala ai ia ka lad ka kabu ban trei na ka bynta jong ki bad kumta ka Swayemsevaks ka dei ban ialam khmat ia ka imlang ka sahlang.
U Bhagwat ula ong; “Ngi dei ban long kiba kloi ban leh ia kiei kiei baroh na ka bynta ka ri.U Dr Keshav Baliram Hedgewar ula seng ia ka RSS ha ka snem 1925 da ka jingthmu ban kyntiew halor ka jingdon jong ki kynhun aijingiarap.Ngi lah ban don ia ki jingiapher ha ki jingsngew hynrei ym ha ki jingmut jingpyrkhat ki jong ngi.”
Nalor kata une u heh ka RSS ula ai ruh ka jingiaroh ia ki nongtrei ka RSS kiba la trei borbah na ka bynta ban tei ia ka ri.
Ula ong ruh ba ka RSS kala don mynta 100 snem bad haduh mynta man la ka snem thymmai kiba bun kiba angnud kila wan shakhmat ban pyniasoh bad kane ka kynhun bad trei na ka bynta ka ri.Une u nongialam ula ai ruh ka jingiaroh ia baroh ki dkhot halor ki jingtrei ba radbah jong ki na ka bynta ka ri.
Shuh shuh ula kdew ruh ba ia baroh ki jingtreikam jong ka RSS la sakhi da ka imlang ka sahlang, kumta ruh ki dei ban pynleit jingmut khamtam ha kaba iadei bad ki paidbah. Ha une u bnai ba la dep haba pynkut ia ka jingleit jngoh ba saw sngi shapoh Bihar, u Bhagwat ula iai ban ba baroh ki briew kiba shong ba sah hapoh Hindustan ki dei ki Hindu.
