Shillong, Naitung 28 : Ka Sorkar Jylla kala rai ban pyntreikam da ki kam kiba heh bha ban pynkylluid ia ka Nongbah Shillong da kaba shna ia ki skywalks, parking lot bad kiwei kiwei ki jingtei ba kongsan ha ki jaka ba ieh shrah jong ki Tnad bapher bapher.
Haba pyntip ia kane hynne ka sngi Thohdieng, u Myntri Rangbah ka Jylla Conrad K Sangma ula ong ba ka jingpynkhreh ia ki Detailed Project Report (DPR) ki dang iaid shaid shaid.
“Ngi khmih lynti ba ia ka DPR bad ka master plan yn sa wanrah noh sha ka Sorkar Jylla hapoh u bnai Risaw. Ngi dei ban lah ha ban shim rai khatduh hapoh u bnai Nohprah” ula bynrap.
U Conrad u pyntip ba dang shen kala don ka jingbatai kaba bniah bha hakhmat ka Sorkar Jylla haba iadei bad ki jaka kiba long trai da ki Tnad bapher bapher hynrei kiba la shu iehshrah bad khlem lah pyndonkam.
“Ngi lah mut ban shim rai noh bad ngi dang pynkhreh ia ki jingdonkam baroh ha kaban aiti noh ia kiba bun na kine ki jaka sha ka Tnad Urban Affairs bad mynta ngin sa shna da ki parking lot lane kiwei ki jingtei ba donkam, ki jingtei ban pynitynnad ia ka nongbah, ki iew ki hat ha kiba bun na kine ki jaka ba don ha kylleng ka Nongbah bad kane kan iarap ia ngi ha kaban wanrah ia ka jingkylluid jong ka Nongbah Shillong ka ban kynthup ruh ia ka jingpynkhreh ban tei ia ka Secretariat ba thymmai” ula ong.
U Myntri Rangbah u pyntip ba ka Sorkar kala rai ruh ban tei ia ka skywalk ne ka lynti iaid kjat na suin, ka ban sdang naduh Barik sha Khyndailad bad na Khyndailad sha kiwei kiwei pat ki jaka.
“Baroh kine ki don ha ka jingpynkhreh hynrei ngam kwah ban batai bniah ia ki namar ngin sa wanrah ia ka plan ba pura katba ngi dang jam sahkhmat ha ka jingpynkhreh bad shen hi ngin sa pyntip sha phi ia ka master plan baroh” ula ong.
