Shillong, Naiwieng 22 : U Myntri Rangbah ka Jylla Conrad K Sangma ha ka sngi Thohdieng, ula pynbna ba ka Sorkar kan sa wanrah noh da ka Standard Operating Procedure (SOP) halor ka jingpyndonkam ia ki siren, tah iit-iong bad pyndait ia ki light pynthaba halor ki kali bad kan pyrrkhing bha noh khnang ban nym ktah eh ia ki paidbah.
U Myntri Rangbah ula ong “Nga la ioh pdiang ia shibun ki jingujor bad ki jingbynniaw na ki nongshongshnong halor kaei kaba ki briew ki ongka VIP culture. Ka dei, hooid, ka kam kaba sngewkhia. Hynrei ngi hap ruh ban peit na kiba bun ki liang”.
“Ka don ka jingsngewkhia ia ka jingiada bad jingshngain, ka bym dei ban pyniakhleh bad ka kam ba dei ban leh. Ka jingshngain bad jingiada ka dei kawei ka kam, kaba ngi sngew ka long kongsan bad ka bym dei ban iapein. Hynrei lada ia kane ka jingsngewkhia ia ka jingshngain bad jingiada ka kylla long pynbna kum ka jingpyni rongphong bad la pyndonkam ha ka rukom ka bym dei, kane nga tharai ka dei shisha ka jingeh” ula bynrap.
U Conrad ula ong, namar kata, ka long kaba kongsan ban the kyndon noh ha ka lynti kaba dei.
U Myntri Rangbah u pyntip ba ha ka taiew bala lah, ula shong jingialang bad u Symbud Myntri Rangbah ba khmih ia ka kam pohiing (Police) Bah Prestone Tynsong, u Chief Secretary Bah DP Wahlang bad ka Director General of Police Kong Idashisha Nongreng bad la bthah ia ka Tnad Pulit ba kan pynkhreh ia ka SOP ban batai mano ba lah bad bym lah ban pyndonkam siren, tah iit-iong bad pyndait ia ki light ba thaba bunrong.
“Hadien bala dep pynkhreh, ngin sa pyntreikam pyrrkhong noh iaka SOP, kynthup ia ki kyndon kiba hap bud haba pyndonkam ia ki siren, ki light thaba bad kiwei kiwei ki tiar” ula ong.
U Myntri Rangbah ula iathuh ba ia kane ka SOP yn sa wanrah hapoh ka jingialang jong ka kynhun Myntri hapoh ka taiew ban wan. “Ngin sa wanrah ia ka SOP ba pyrrkhing bha haba iadei bad mano ba lah bad mano bym lah ban pyndonkam siren, tah iit-iong bad pyndait ia ki light thaba halor ki kali, hangno ki lah ban pyndonkam bad kumno ki dei ban pyndonkam”.
Hynrei, ula ong ba ka kam ba iadei bad ka jingshngain bad jingiada ruh ka dei ka mat ba hap iakhmih bha. Ki don ki kyndon kiba donkam ban hap bud ia kito ki heh ki hain kiba hap ha ki kyrdan bapher bapher kum ki Z Plus, Z bad Y bad kine ki dei ki kyndon bala batai bniah, ki bym lah ban iapein, ong u Myntri Rangbah ka Jylla.
“Kine ki bynta ki dei ia kiba hap ban pynbiang tarajur. Kumba nga la kdew, haba buh hakhmat eh ia ka jingshngain bad jingiada, ngi hap ban khmih ruh ban pynthikna ba ym dei ban pyndonkam bakla ia ka, ka ban long pat ka jingpyndik ia u paidbah. Ka jingpynbiang tarajur ia kine baroh ar bynta ka long kaba donkam” ong u Myntri Rangbah ka Jylla.
“Ngi kyrmen ba lyngba kane ka SOP, ka ban sa mih shen, bad ka ban sa ioh jingmynjur da ka Kynhun Myntri, ngi dei ban lah ban pynduna ia ki jingpyndik ia u paidbah” ong u Myntri Rangbah.
