Shillong, Iaiong 03: Ka Khasi Students’ Union ha ka sngi Palei, kala kyntu ia ka Committee ba la thaw da ka Sorkar jylla ban wanrah jingkylla ha ka rukom treikam MPSC ba kan pynrung lang ia ki 20 tylli ki mat jingdawa ka Seng ban lah pynthikna ia ka jingtreikam kaba shai, ka jingthungkam kaba leh hok, ha ka jingai jingmut ka ban sa aiti shen sha ka Sorkar Jylla.
Ha ka shithi bala phah sha u Chairman jong ka Committee u Bah F. R Kharkongor uba long ruh u Commissioner & Secretary ka sorkar jylla, ka KSU kala ong, “Ka Union ka kyrpad da kaba sngewrit ban kynthup lang ia ki 20 tylli ki mat jingdawa kiba la kdew da ka Union bad kala kdew ruh ia ki katto katne ki mat kiba dei ban pdiang ban wanrah ia ka jingkylla ha ka rukom thungkam ha ka jylla”.
Haba pynpaw ia kitei ki 20 tylli ki mat jingdawa, ka seng kala ong ba ka MPSC kadei ka kynhun kaba don ia ka bor kaba ha khlieh eh ban thungkam thungjam ha ka jylla hynrei kala duna pat ha kaban don ia ki kyndon jingbthah bad ban pyndonkam ia ki kor teknoloji bad ka donkam ban wanrah ia ka jingkylla.
Ka jingthaw ia ka Committee kadei ka lynti kaban lam sha ka sienjam ban wanrah ia ka jingpynthymmai bad ia ka jingkylla. Hynrei kumba long mynta ha Meghalaya, ki don ruh kiwei pat ki Recruitment Board kiba la iai mih bad ki bym don ia ki polisi treikam bad ka jingbym khuid ne don jingkitkhlieh. Kine ki Recruitment Board kim dei kiba la shah ialam ha kino kino ki kyndon ain bad ki treikam katkum ha ka mon ka jongki.
Nalor kata, ki don ruh ki tnad kiba pynlong hi ia la ka jong ka jingpynrungkam, interbiw khlem kino kino ki kyndon ain ne ka jingsheptieng ia ka jingkitkhlieh.
Ka KSU kala kdew ba ka Meghalaya Medical Service Recruitment Board (MMSRB) kum ka nuksa bad ong ba ha u Nailur 2024 ia ka resol jong ka 164 Staff
Nurse kaba la pynbna da ka Board kala don da ki jingbakla suda. Kila don bun tylli ki resol kiba la pynmih kiba la dap da ki jingbakla bad jingduna. Ki jingkylli, ki jubab ne Answer Keys ki long kiba don jingbakla bad ka jingpynrungkam baroh kawei ka long kaba kynrum kynram.
Ka seng kala hap ban tuklar ia kane ka kam bad haba kala khmih bniah, kala shem ba kam shym la don kano kano ka Recruitment Rules ne Regulations, ki dkhot jongka Board kidei kiba la khlieh da ki ophisar sorkar, hynrei ia ki kam ki jam baroh la shu bret sha ki doctor jong ka DHS ki bym dei ki riewshemphang ha kaba iadei bad ka kam pynrungkam pynrungjam bad kidei kiba la khia lypa ha kam kaba ki trei.
Ka seng kala pynpaw haba thaw ia kano kano ka Recruitment Board, ia ki kyndon jingbthah kiba paka, ki Rule bad kiwei kiwei dei ban buh hakhmat eh, lem kumta kan long ka jingbym ai ia ka hok ia kiba aplai ne kiba don ia ka jingangnud bad kan plie lynti ban don ia ka jingbamsap bad ka jingshah liang.
“Ka Union ka kwah ban ai jingmut ba ki jingbthah kiban pynmih da kane ka Committee kidei ruh ban treikam lang ha ki Recruitment Board lada shem ba ka long kaba ai jingmyntoi ban bteng bad kumjuh ruh ia ki District Selection Committee khnang ba kan don ka jingryntih ha kaba iadei bad ki kyndon thepkam bad kan ym don kano kano ka jingleh bym biang ha ka rukom jied. Ka Union ka ai jingmut ba ia ka jingpynrungkam ym dei ban leh hi da ka tnad hynrei dei ban leh da ki bor kiba dei khmih kiba lah ban leh bad trei ia ka kam, ban kiar na ka jingshah liang bad ka jingbamsap” la ong ka KSU.
Nalor kane ka seng kala pynapw ba ka bai ialeh eksamin kaba la pynlong da ka MPSC, DSC bad ki Recruitment Board ka long kaba rem, ha kaba kiba aplai ki hap ban siew T.500 ne palat na ka bynta kano kano ka kam kaba ki aplai.
Katba ha ka jingthungkam ha ka Central Recruitment, kala don ka jingpynduna ia ka bai ialeh eksamin ia ki Scheduled Tribes ne kam shym la don satia kano kano ka jingsiew ruh, katba ha ka eksamin kaba la pynlong hapoh ka jylla kiba bun kidei ki Scheduled Tribe jong ka jylla hynrei la shim ha ka dor kaba rem na ki. Kala ai jingmut ruh ba kadei ban don ka jingbuh ia ka dor jong ka bai ialeh eksamin kaba kiba aplai kidei ban siew khnang ba kan ym ktah ia kito kiba wan na ki longiing kiba duna ha ka ioh ka kot ban pynduh noh ia ki ia ka lad ban aplai.
Ka seng kala pynpaw ruh, ba ki briew kiba don jingduna ha ki dkhot met kim ioh ia ka jingkyrshan na ka sorkar ha kaba iadei bad ka lad ban iohkam iohjam bad watla kala don ka jingbhah kyrpang na ka bynta ka jongki ha ki tnad sorkar hynrei kam shym la don pat kano kano kyndon jingbthah ban ailad ia kum kitei ki briew ban ioh ban ialeh ia ka eksamin.
“Dei ban pynbiang ia ki jingdonkam ki jongki ryngkat bad ia ki tiar ki tar ban pynthikna ba kidei ban long kiba ia ryngkat bad kiwei pat. Ia ka Rights of Persons with Disabilities (RPwD) Act, 2016 dei ban pdiang da ka sorkar ban pynthikna ba dei ban ai lang ia ka lad ia ki briew kiba don jingduna ha ki dkhot met” kala ong.
Hadien ba ka seng kala pynlong iaka jingiakhih bad ka jingpyrshah ia ka MPSC ha u Nailar 2024, ka seng kala lap ba kala don ka jingpynsted ha ka jingpynlong kloi ia ki eksamin bad ka jingpynbna ia ka resol kaba ym shim la leh ha ki snem kiba la leit bad la ai ruh ia ki ‘Answer Keys’ sha kiba aplai bad kila don ruh ki katto katne ki jingkylla.
“Hynrei hapdeng jong kine ki jingkylla, hynrei kila don pat ki jingbakla kiba khraw bad ki jingduna ha ka jingpynrung kam. Ka seng ka lah ban ai ia ka nuksa, ha kaba iadei bad ka jingpynrungkam ha ka kyrdan Asst. Public Prosecutor, u kyrtong u bym biang ula shah jied khlem ka jingdon ia kano kano ka jingshemphang, kaba la pynlong ia ki kyrtong ban mudui sha ka iingkashari ia katei ka rukom thungkam, ha kaba iadei bad ka jingpynrung kam ha ka kyrdan Typist (HOD) ka Commission kala iaid lait ia ka jingpynbna ne Advertisement kaba kala pynbna bad kala leh pyrshah ia ka Rule kaba la don lypa jong ka Meghalaya Directorate Establishment (Ministerial) Service Rules, 2010 kaba la pynmih ia ka jingpyrshah jur halor ka jingshah liang” kala ong bad kine ki mat kin ym lah ban kylla, tang lada ka don ka jingwanrah ia ka jingpynkylla kaba thymmai da ka Commission bad kiwei pat ki Recruitment Board.
