Guwahati, Naiwieng 11: Ka Assam kan peitngor halor ki jingtreikam jong kumba 2,500 tylli ki skul madrassa kiba dei jong ki kynhun shimet ha ka jylla khnang ban khanglad halor ka jingioh rung khlieh jong kiba bun ki kynhun lehnoh jihadi, kaba kynthup ia ki briew kiba dei napoh Bangladesh kiba wan rung sha kine ki skul niam kum ki nonghikai naduh kine ki khyndiat bnai ba la dep.
Ha ka jingialang hapdeng u DGP Bhaskar Jyoti Mahanta, u state secondary education director u Mamta Hojai bad ki nongmihkhmat na ki santylli ki skul madrassa shimet ha ka sngi Balang ba la lah, la shim ia ka rai ba hashwa ban pynrung ia kino kino ki nonghikai kiba na shabar ka jylla, kine ki madrassa kin hap ban pyntip sha ki bor pulit na ka bynta ka jingpynithuh ia ki, kumjuh ba ka jingiajngai jong kine ki skul kawei na kawei pat ka dei ban long kumba lai kilomitar.Nalor kata ka jingpynrung skul hapoh kine ki madrassa ka dei ban long tang haduh 100 ngut.
Nalor kata kine ki skul ki dei ruh ban upload ia ki jingtreikam bad kiwei pat ki kynhun kiba pyniasoh kat haduh ka 1 tarik u Nohprah u ban wan.Na ka liang kine ki madrassa shimet kila ong ba kila pdiang ia ki sienjam ba la shim da ka sorkar, hynrei ki kwah pat ba na ka liang ka sorkar kan ym pynthut ha kaba iadei bad ka jingpule kaba iadei bad ka niam ka rukom hapoh kine ki madrassa.
Kine ki santylli ki skul madrassa shimet ki kynthup ia ka All Assam Tanzim Madaris Qaumiya, All Assam Talimi Tarakkee Board, Madras Education Board All Hafis (Salafi), Adara Madaris Islamia bad ka All Assam Ahle Sunat Madrasa.
U nongaiktien ka tnat pulit ka Assam ula ong; “La pynpaw shai ba la khang pyrshah ia kino kino ki dkhot jihadi ba kin ioh riehtngen hapoh kine ki skul madrassa ha ka jylla ha ka kyrteng jong ki nonghikai niam.”
Ki pulit ka Assam kila ioh ban kem haduh 84 ngut ki lehnoh jihadi na ki bynta bapher bapher ka jylla naduh u snem 2016, ha kaba 10 ngut na ki la shem ba kidei kiba don bynta bad ki madrassa.Arngut ki nong Bangladesh kiba don bynta bad kawei ka skul madrassa ha Goalpara district kila don hapdeng ka jingphetrieh.
Na ka liang ka sorkar jylla kala pynpra noh ia ki laitylli ki skul madrassa ha ki laitylli ki district ha u bnai Nailur ba la dep hadien ba la shem ba la pyndonkam ia ki na ka bynta ki jingtreikam jong ki lehnoh jihadi kiba dei na ka kynhun AQIS/ABT.
