Shillong, Jylliew 09 : U Myntri Sorkar Bah AL Hek ha ka sngi Nyngkong, ula ban jur ba dei ban ujor da ka mukotduma pyn mynrain khmat pyrshah ia kito kiba pynthohbria ia ka Meghalaya hadien ka jinglap ki Pulit ia ki jingshisha halor ka jingshah pyniap u nong Indore ba wan honeymoon ha Sohra bad jingleit pyndem ka kurim hakhmat ki Pulit na Uttar Pradesh.
“Ka iing ka sem jong kine ki shikurim kila kynnoh ia ka Sorkar Meghalaya bad ki Pulit bad khamtam ka long kaba jah burom ba kila kynnoh ia ki nongshongshnong ka Meghalaya” ong u Bah Hek haba iakren bad ki nongthoh khubor.
Haba kylli, u Myntri ula ong “Nga la ong ha phi ha ki sngi bala leit noh ba ngi dei ban ujor da ka mukotduma pynmynrain khmat pyrshah ia kine ki briew kiba pynthohbria ia ka Jylla Meghalaya bad ia ki nongshongshnong ka Meghalaya. Ngi gap ban mudui da ka mukotduma pynmynrain khmat”.
Haba ai khublei ia ki Pulit ka Meghalaya, u Bah Hek ula ong “ Kila leh ia ka kam kaba itynnad bha. Tang hapoh 7 sngi kila ioh ban kem ia ki runar bad hapoh 7 sngi kila pyni ia ka jingtbit jong ki ban trei ia ka kam. Bravo ia ki Pulit ka Meghalaya. Kila leh ia kaba bha tam ban kem ia ki briew kiba donkti”.
