Shillong, Nohprah 07 : U Symbud Myntri Rangbah ba khmih ia ka Tnad Transport Bah Sniawbhalang Dhar ha ka sngi Saitjain, ula ban jur ia ka jinglong kongsan ki nongniah kali ia ki politician, ki heh Sorkar bad kiwei kiwei.
Haba kren ha ka jingrakhe jubili ksiar bad pynkup burom da ki Nongniah kali Sorkar kiba don hapoh ka shatei Meghalaya Govt. Driver’s Welfare Association (MGDWA) ha Soso Tham Auditorium, u Bah Sniawbha ula ong “Ki nongniah kali ki dei uwei na ki paia jong ki Politician, ki Heh Ophisar lane ki nongkhaii bad khlem ma ki, ngin ym poi shano shano ruh”.
“Ngim ju shim ia phi kum ki nongniah kali hynrei kum ki kynrad namar lada phi niah ha ka lynti kaba bakla, ngi la makna ma ngi” ula ong.
Haba ban jur ia ka jingdonkam ia ki nongniah kali kiba biang, u Symbud Myntri Rangbah ula ong “U Nongniah kali uba biang um dei sati auto uba niah ha ki surok highway, u nongniah uba biang u dei uba niah ha ki surok khohruh khohram. Ynda phi la tbit ban niah ha ki surok sniew, ka highway kam don jingeh eiei hakhmat jong phi”.
U Bah Sniawbha ula ong ruh ba u dei uba ar hapoh ka Jylla Meghalaya ban niah ia ka kali ha ka rta kaba 9 snem. U pyntip ba ki don palat 398 ngut ki nongniah kali kiba treikam ha ka kompani jong u.
Ula iaroh ruh ia ki nongniah kali namar ka jinglong iai shah bad jingaiti lut haba trei iala ka jong ka kam.
