Tura, Rymphang 04 : U Myntri Rangbah ka Jylla bad National President ka NPP Conrad K Sangma hynne ka sngi saitjain, ula iai ban biang ba ka Trinamool Congress (TMC) ka dei ka party nongwei ha Jylla Meghalaya bad kam don satia kata ka jingsngew iapher jaidbynriew haba kren ia kane.
Haba iakren bad ki nongthoh khubor hadien bat hep kyrteng ha Tura ban iakhun ia ka elekshon MLA, ka ban long ha ka 27 tarik Rymphang, u Conrad ula ong “Ka TMC ka dei ka Party kaba mih na West Bengal bad kane ka dei ka jingshisha. Kam don satia ka jingkren tam halor kane”.
Haba jubab ia ki jingkynnoh u Nongialam ka TMC Dr Mukul Sangma ba une u Khlieh ka NPP ula pynmih ia ki kyntien sngew pher jaidbynriew, u Conrad ula kyntait ba ula pynmih ia kine ki kyntien bad ong “Nga la ong baka (TMC) dei ka party Nongwei kaba la pynwan kat kum ka jingkren ka Mamata Banerjee ha ka elekshon West Bengal ba dang shu dep haba ka ong ba ka BJP bad kiwei ki National Party ki dei ki party nongwei”.
“Nga la ong ba lada pyndonkam da u juh u shabuk ha Meghalaya, une u shabuk ba ka Mamata Banerjee kala kren ha ka jingialap elekshon, ka TMC ruh ka dei ka party nongwei hangne. Kam don satia kata ka jingkynthoh ban wanrah ia ka jingsngew pher jaidbynriew” ula bynrap.
Ha kajuh ka por, ula kyntu ia u Dr Mukul uba mih iakhun na artylli ki constituency-ka Songsak bad Tikrikilla, ba u dei ban khuslai ialade namar ka lynti ba un jop na baroh artylli ki jaka ka long kaba khim bha. Ula ong ba ki paidbah ha Tikrikilla kila kylli ba kano ka constituency ba u Dr Mukul un sa ieh lada u jop na baroh artylli ki jaka.
