Ban tehlakam ia ka jingkit palat pud ki trok
Shillong, Jymmang 03 : Ka Iingkashari Meghalaya High Court hynne ka sngi Balang kala ban jur ia ka jingdonkam ban nang pynbun ia ka jingdon ki weighbridge bad jaka talasi nalor ka jingpyntreikam ia ki weigh-pads ki ban tehlakam ia ka jingkit palat pud jong ki kali ba iaid ha ki surok ka Jylla lane National Highway.
“Kumba la pynsngew kham hashuwa, dei ban pynbun ia ka jingdon ki weighbridge bad ki jaka talasi” ong ka Division Bench bala khlieh da u Chief Justice Sanjib Banerjee bad Justice W Diangdoh ha ka hukum bala pynmih hadien ba shong bishar ia ka PIL bala mudui da u Tennydard Marak.
“Hooid, ki electronic weigh-pads bala pynpaw da ka Sorkar Jylla ka dei ia kaban pyntreikam ha kiba bun ki jaka kynthup ki jaka ba kit maw bad ki surok ba lam sha ki Land Custom Station” kala bynrap.
Ka Iingkashari kala kyrmen ruh ba ki 23 tylli ki weighbridge ba ka Jylla kala kular ban pyntreikam, kin sdang treikam noh hashuwa ba kan don ka jingbishar biang ia kane ka kam.
“Nalor kata, ki weigh-pads, kaba, kat kum ka jingong ka Jylla, kan shongdor T. 27 lak kawei, dei ban thied noh ha kaban pyndonkam ha ki jaka ba kongsan” kala ong.
Ka kaiphod bala ai da ka Jylla halor kane ka kam kala pynpaw ia ka jingpyndep pynlong ia ki prokram pynsngewthuh hapdeng ki nongtrei Sorkar bad kiwei ki kynhun khnang ban pyntip ba ki trok ba kit palat pud kin nym iaid shuh ha ki surok ka Jylla lane National Highway ha Jylla.
Ia ka kyrwoh khubor la pynmih ha ka 17 tarik Iaiong, 2023 ba batai ia ki jait kali, ki axle jong kine ki kali bad u pud jingkhia ban kit mar jong kine ki kali.
Ha kajuh ka por, ka Iingkashari kala bthah ia ka Jylla ban nang ai ia ka kaiphod ba kham bniah hashuwa ka 16 tarik Jylliew.
