Tura, Nohprah 27 : Ka dei ka sngi jong ka jinglehkmen da ki jingrwai, jingshad, ki jingiabam sngewbha bad jingiaduwai kyrpang ban pdiang ia ka jingwan longbriew u Jisu Khrist, hynrei artylli ki Longiing ha West Garo Hills kila mad iaka jing sngewsih ha kane ka sngi namar ka jingbamduh ka ding ia ki Iing jong ki bad baroh ki jingdon jingdem.
Ka ding kala bamduh ia ka Iing jong ka Nun (Sister) Catholic Missionary bad ka iing u Nongrep uba kamai jakpoh da ka jingdie ia ki jri ba u pynmih na ka jaka rep.
Kane ka jingjia kala jia ha ka shnong Mandagre kaba hap ha Selsella ha ka por 7:30 baje janmiet jong ka sngi rakhe ia ka Khristmas. Kine ki Longiing kim shym la lah ban sei wat tang khyndiat ruh ki tiar.
Kane ka Missionary Sister ka Lenna Ch Marak jong ka MSMHC ka dei ka Principal jong ka Kasturba Gandhi Balika Vidyalata School ki Kynthei ha Baghmara, South Garo Hills, kaba khmih bad ai jaka sah, pule puthi ia ki Khynnah Kynthei kiba wan na ki longiing kiba duk.
Ha kawei pat ka jingjia, une u nongrep diengjri ula duh haduh san tylli ki Iing na ka jingpluh ding kaba mih na ka kamra shet jingshet. Kane ka jingjia kala jia ha ka por 12:30 baje shiteng miet katba ki Khun ki dang ialeit lehkmen ha ka jingiashad sngewbha hapoh ka jaka Shnong.
Une u Nongrep u kyrteng u Nengran Sangma ba na Upper Kongrapara, kaba hap hapoh ka Rongsai Police Outpost, West Garo Hills.
Ha ka jingtohkit ki Pulit, la shem ba une u Nongrep ula thad ia ki jri hapoh ka ryngien ba don ding bad la suba ka miaw kala leit rung ha kane ka jaka rep bad pynhap ia kine ki jri hapoh ka ding, kaba la pynklang ia ka ding haduh ba kala ioh ban bam duh ia baroh ka iing.
Ki Kmie Kpa kiba iathiah hala iing, kila ioh ban pyllait im ialade hynrei baroh ki jingdon jingem kynthup ka pisa, ki mar bam, tiar shet, ki jain ki nep bad ki kot ki sla kila iingkhong khait.
