Nongpoh, Lber 19 : Kawei ka trok ba kit soh water melon, kala iingkhong khait na ka jingpluh ding ha ka step phyrngap jong ka sngi Palei ha surok NH-06, ha ki thain Shangbangla, Ri-Bhoi District.
Kane ka trok ba don u nombor JK02-CB-4335, ka dei kaba wan kiew na Guwahati sha Shillong hynrei ha ka por 2:30 baje mynstep, kala shu kem ding hi kynsan kynsan ha NH-06. Ia kane ka trok la niah da u Datta Wagmare uba dei na Maharashtra.
Haba ioh jingtip ia kane ka jingjia, ki Pulit ka Nongpoh Police Station kila hiar wut wut sha ka thain Shangbangla ryngkat bad ki kali pynlip ding na Nongpoh, ban tem ia ka ding hynrei ka ding kala ioh ban bam duh ia kane ka trok.
Ki Pulit ki antad ba ka jingkem ding kane ka trok ka lah ban dei na ka jingthut ka wiring lane short circuit hynrei donbok ba ha kane ka jingjia, ym shym la don kano kano ka jingmynsaw ne jingjia ba sngewsih.
Ki Pulit ki dang pynlong ia ka jingtohkit halor kane ka jingjia.
Kaba ithamula ka long ba ki paidbah nongleit nongwan, haba poi ha kane ka jaka, kila ia muja ban tam ei ia ki soh water melon kiba dang bha.
